2019 елда эшче һөнәрләр буенча чемпионат Казанда үтәчәк

Эшче һөнәрләренең абруен арттыру, һичшиксез, турыдан-туры икътисадның үсеше белән бәйле, ә бу Республика җитәкчелеге һәм аның Лидеры Рөстәм Миңнеханов үз алдына куйган өстенлекле бурычларның берсе. Республиканың сәнәгать предприятиеләре һәм вузлары белән берлектә Татарстан җитәкчелеге эшче һөнәрләрен үстерү һәм популярлаштыру белән кызыксына. Үткән елда Татарстанда 5 ресурс үзәк пәйда булды, быел тагын 5 ачылачак. Республикада барлыгы 25 заманча ресурс үзәкләр булачак. Көллиятләр һәм югары уку йортлары җирле товар җитештерүчеләр белән үзара бәйләнештә инде.

Соңгы елларда безнең Яңа Чишмә районында да яшьләрне районда калдыру буенча уңай тенденция күзәтелә. Моңа яшь гаиләләрнең торак шартларын яхшыртуда ярдәм күрсәтү буенча республика президент программалары, эшче һөнәрләренең абруен күтәрү, яхшы хезмәт хакы түләү, хезмәт эшчәнлеге өчен тиешле шартлар булдыру һ.б. да булышлык итә.

Яңа Чишмә электр челтәрләренең оператив-күчмә бригадасында яшь электромонтерлар Александр Суслов һәм Николай Пузиков намуслы хезмәт куялар. Алар икесе дә Чистай совхоз-техникумын тәмамлаганнар. Александр үз эшен 2 нче разрядлы электромонтер булып башлый, ә хәзер 5 нче югары разрядка ия.

-Мин туган ягымнан беркайчан да китәргә уйламадым, - дип сөйли ул. - Бездә хезмәт шартлары да, хезмәт хакы да бик яхшы, гаиләбездә улыбыз үсә, төзекләндерелгән торагыбыз бар, кешегә тагы ни кирәк? Яңа Чишмәдә спорт залы, бассейн бар, кибетләр дә җитәрлек. Шулай булгач, безне бар нәрсә дә канәгатьләндерә.

Электр челтәрләре начальнигы Харис Хөсәенов яшь электромонтерлар хакында, намуслы, эш сөючән егетләр, дип сөйли.

-Александр - һөнәри осталык буенча ярышларда иң актив катнашучы, - дип сөйли ул. -Үткән ел безнең егетләр Чистай зонасында 3 урынны яуладылар.

Николай кыска гына вакыт эчендә үзенең сәләте һәм осталыгы белән 4 нче разрядка ия булган һәм хәзер иң яхшы монтерлар исемлегендә. Ул әле электр челтәрләренең җыелма волейбол командасының алыштыргысыз капитаны да, агымдагы елда республика ярышларында барлык челтәр компаниясенең данын яклаган.

-Эшче һөнәрләре буенча чемпионатның Казанда үтәчәге турында белгәч, без бик сөендек, - дип сөйлиләр Александр белән Николай. -Әлеге ярышларда чыгыш ясау теләге бар безнең һәм илнең җыелма командасына эләгә алсак, югары нәтиҗәләр күрсәтергә тырышачакбыз.

Азат МУСИН