Хәерле сәгатьтә, игенчеләр!

Комбайнчылар Сергей Сальников (ярдәмчесе Алан Фәсхетдинов) һәм Сергей Топтыгин (ярдәмчесе Роман Толстов) белән.

Игенчеләр өчен иң җаваплы чор - урып-җыю вакыты җитте. Бу ел игенчеләр өчен уңай булды - уңыш мул булырга ошаган һәм хәзер барлык культураларны югалтуларсыз җыеп алырга кирәк.

Район буенча 67 мең гектарга якын бөртекле һәм техник культураларны җыеп аласы бар. Шуларның 20,4 мең гектары - көзге культуралар, 4,3 меңе - сабан бодае, 4,7 мең гектары - арпа, 600 гектары - солы, 180 гектар - вика, 2920 гектар - бөртеккә кукуруз һәм 56 гектар борчак.

Иң зур мәйданны (33500 гектар) югары маржиналь техник культуралар били. Бу: 14700 гектар рапс, 9200 гектар орлыкка көнбагыш, 680 гектар горчица, 2160 гектар соя, 100 гектар киндер, 180 гектар шепкән, 6500 гектар майлы җитен.

Комбайннарның техник әзерлеге начар түгел, моны үткәрелгән техник караулар да раслый. Урып-җыю вакытында комбайннарның герметиклыгына һәм янгыннан каршы саклану чаралары белән җиһазландырылуына аерым игътибар бирергә кирәк.

Эссе көннәрдә бөртеклеләр тәүлек саен 2,5-3%ка кадәр дым югалта һәм моны булдырмас өчен аларны үзвакытында җыеп алырга кирәк.

Урып-җыюда 70тән артык комбайн эшләячәк, урып-җыю мәйданы 67 мең гектарга якын һәм бу шактый күп. «АгроРаздолье» ҖЧҖ, «Чишмә-Агро» ҖЧҖ (элеккеге «Агро-Основа» ҖЧҖ) кебек эре агрофирмалар комбайннарны читтән җәлеп итәчәк, чөнки аларның урып-җыю мәйданнары бик зур (27600 һәм 20800 гектар).

Кайбер хуҗалыкларда ындыр табакларын, үлчәү хуҗалыкларын, сортларга аеру һәм киптерү агрегатларын әзерләү буенча хәл ителмәгән мәсьәләләр бар - аларны да яңа уңышны кабул итүгә тулысынча әзерләргә кирәк.

Районда беренчеләрдән булып урып-җыюга фермерлар Виктор һәм Александр Козловлар керешкән.

-500 гектар көзге бодайның 300 гектарын теземнәргә салдык, аннары теземнәрне суктырачакбыз, - ди Виктор Александрович. - Калган 200 гектарны да шул ук ысул белән җыеп алачакбыз, уңыш яхшы булырга ошаган.

Ә менә «АгроРаздолье» ҖЧҖдә көзге культураларны турыдан-туры суктыралар, чөнки мәйданнар чиста, чүп үләннәре аз.

Без мәйданы 565 гектар булган кырга килдек, анда 15 «Торум» һәм «Тукано» комбайннары көзге бодайны җыю белән мәшгуль иде. Тагын 12 «Нью - Холланд» һәм 6 «Полесье» комбайннары килер дип көтелә.

- Бездә көзге культуралар 11,4 мең гектардан артык мәйданны били, - ди агроном Иван Сафонов. - Язын шытымнар бик үк нык булып чыкмасалар да, яхшы минераль тукландыру (бер генә тапкыр түгел), чүп үләннәргә, корткычларга һәм авыруларга каршы көрәш, яфрактан тукландыру безгә мул уңыш үстерергә мөмкинлек бирде, кырда гектарыннан 52-54 центнер чыга. Әлегә 1300 гектарда уңыш җыеп алынды.

Комбайннар, нигездә, яңа, алар кадрлар белән тәэмин ителгән. Узган елгы җиңүчебез Александр Кочетов быел да беренчеләр сафында. «Шартлар яхшы, тырышлык белән эшлибез, техника ватылмыйча эшләсен һәм һава торышы уңай булсын иде», - ди ул. 

Александр Кочетов