40 ел элек без ниләр турында язган идек

«Яңа Чишмә хәбәрләре», 1985 ел, 8 август саны Районда урып-җыю эшләре башланды. Һәм менә «Красный Октябрь» ОПХда 9 машинадан торган беренче олау - яңа уңыш элеваторга озатылды. Яхшы уңыш алуга сөенеп, митингта ОПХ директоры Александр Губкин, партком секретаре Суфия Ибраһимова һәм машина йөртүче Владимир Емельяновлар чыгыш ясады. 9 машинадан торган колонна арыш төяп Чистай элеваторына юнәлде.

Урак алдынгылары да билгеләнде. Алар арасында «Черемуховский» совхозы комбайнчылары Павел Сальцин, Николай Зубов, Александр Морозов, «Буревестник» совхозыннан Василий Темников, «Алга» колхозыннан Рәхимҗан Хәмзин һәм Наил Дәүләтшиннар бар, алар уракның беренче көннәреннән үк югары нәтиҗәләр күрсәтәләр.

«Яңа Чишмә хәбәрләре», 1985 ел, 10 август саны

«Ваемсызлык адресы - «Кичуй» колхозы» - яңа уңышны кабул итүгә әзер булмаган ындыр табагы турындагы язма  шулай аталган. «Ындыр табагы территориясен ярты метр биеклектәге  чүп үләннәре баскан, АВМ буш тора, ындыр табагы мөдире дә, агроном да юк. Партком секретаре М.Мөбәрәкшин бу хәлне авылда яшәүчеләрнең барысы да үз хуҗалыклары өчен  печән әзерләү белән мәшгуль булулары белән аңлатты. «... Ә урып-җыю эшләре башланганчы, колхозчыларга печән чабу участоклары бүлеп бирелмәгән иде», - дип яза автор. Кырда исә бункерларына ашлык тутырган  ике комбайн басып тора, чөнки ындыр табаклары әзер түгел. Колхоз рәисе иртәгә үк барлык урып-җыю эшләрен җайга салырга вәгъдә бирде.

Шул ук санда комбайнчыларның хезмәт хакы бәяләре басыла. Җитештерү нормаларын үтәгәндә бәяләр урып-җыюның беренче 10 көнендә 60% ка арттырыла, комбайнчыларга 3әр центнер бөртекләтә  бирелә, шулай ук премияләр - беренче 100 тонна бөртек суктырган өчен - 65 сум, икенче 100 тонна өчен - 80 сум, өченче һәм аннан соңгы 100 тонна өчен - 100әр сум түләү каралган (ул елларда уртача хезмәт хакы аена 100-110 сум тәшкил итте - Азат Мусин искәрмәсе).

«Яңа Чишмә хәбәрләре», 1985 ел, 13 август саны

Тат. Волчья авылында иске клубның начар эшләве турында авыл яшьләренең хаты бастырыла. Бина тузган, менә-менә ишелергә тора. Шуңа күрә аны янгын хезмәте япкан.

Яңа клуб 1978 елда ук төзелә башлый, ләкин 7 ел эчендә бернинди алга китеш тә юк - кирпеч, ком китергәннәр, аларны акрынлап урлый торалар. «Кичләрен без клубка Яңа Ибрай авылына барабыз яки өйдә генә утырабыз», - диләр яшь егетләр Минсәгыйть Сабиров һәм Рәис Сәлахов. Боз кайчан кузгалыр, монысы билгесез.

«Буревестник» совхозының тәҗрибәле һәм намуслы механизаторы Рәис Вәлиуллин терлек азыгы әзерләүдә югары нәтиҗәләргә ирешә.

Редакциядән. Күптән түгел без аның турында 90 яшьлеген билгеләп үткәндә язган идек.