Изге урыннарны чүпләмәскә кирәк

Без 24 июль көнне авыл җирлеге башлыгы вазыйфасын башкаручы Ләйсән Әбдрәфыйкова белән зиратта булдык. Ул авыл халкы, өлкән яшьтәгеләр зират территориясендәге чүп-чарны җыештырып торалар, аны елга бер-ике мәртәбә туганнарының каберләрен зыярәт кылырга кайтучылар үзләре каберләрне чистартып, чүп-чарын зират капкасы янында калдырып китәләр, ди.

-Зират капкасына халык үзе акча җыйды, үзе куйды, күптән түгел буяп та куйдылар, үзләре чисталыкны саклап, ямьлелекне кайгыртып, изге урынны үзләре чүплиләр булып чыгамы? - диде ул. Әйе, тубылгытаулылар контейнер куйдырта алмаганнар, куйсалар да, күпләре чүпне анда илтеп җиткерә алмас, зират коймасы янәшәсендә ташлап калдырыр иде. Эшне мәдәниятле итеп тә оештырып була, югыйсә: үзең белән чүп-чар капчыгы алып, шуңа тутырып, якындагы чүплеккә генә илтеп ташлыйсы.

Тубылгы Тауда туып үскән Рәфис Хәбибуллин: "Корыган үләннәр генә калдырсалар әле бер хәл, "зираттан берни алып кайтырга ярамый" дигән гыйбарәне истә тотып, кешеләр биредә буяу банкаларын һәм пумалаларын ташлап калдыралар, ә менә тырмаларын, ломнарын, чалгыларын бер дә калдырмыйлар", - дип сөйли.

Авыл җирлеге хакимияте кеше күп йөри торган җирләргә ата-бабаларыбыз истәлеген нәҗесләмәүгә чакырып белдерү кәгазьләре хәзерләгән, бәлки инде аларны элгәндер дә.

Лариса ФЕДОРОВА