95 яшендә дә күтәренке рухта

Биш ел элек без ул вакыттагы 90 яшьлек юбиляр әбинең тормышы турында язган идек, ә бүген исә без аңа менә мондый сорау бирдек: «Биш елдан соң сез биш яшькә олырак булудан тыш, нәрсәләр үзгәрде?»

Сорауны укыгач (Анна Семеновна начар ишетә), ул шунда ук безнең сорауны шаяртуга борып, елмаеп кына җавап бирде:

— Бу вакыт эчендә безнең туганнарыбыз 8 кешегә артты. Хәзер минем 8 оныгымның оныгы бар. Ә калганнары — элеккечә, үзгәрешләр юк, диде.

«Ә «элеккечә» диюе бу әнинең әле дә яшь булуын һәм өйдә ниндидер эш башкарырга тырышуын дәвам итәргә теләвен аңлата. Дөрес, хәзер аңа моны эшләү күпкә авыррак, — ди аның кызы Мария Васильевна. -Аның бакчадагы эшләрне эшлисе, гөмбә җыярга да барасы килә. Нинди гөмбә турында сүз булсын, ди инде! Икебезнең дә аяклар авырта, озак еллар фермада резина итекләр киеп йөрүнең, авыр бидоннар күтәрүнең нәтиҗәсе, хәзер боларның барысы да сәламәтлеккә тәэсир итә шул. Ләкин «Быел гөмбәләр юк, ел коры булды бит», дип әнигә язып күрсәтәм. Ул кайгыра: «Нишлисең инде, гөмбәсез булырбыз», ди.

Безгә инде туганнарыбыз тозлысын да, маринадланганын да бирделәр. Ә бит әни үзе аларны ашамый. Ә чыгып йөрер өчен генә әйтүе. Ә мин ярдәм дә итәр идем дә, ләкин, кызганычка каршы, юк шул... Күптән түгел үзем хастаханәдә яттым, бу вакытта әнине чиратлашып сеңелләрем Аня һәм Нина карады. Алар, әлбәттә, аны үзләре белән бакчага да алып чыкканнар, аның егылып китүеннән дә курыкканнар, шулай булмый ни, чөнки ул нинди дә булса берәр эшне эшләргә омтылып карый. Гомумән алганда, әни үзенең бакчада, саф һавада утыруыннан канәгать булган. Ә биш ел элек ул үзе чыгып йөри иде... 

Юбилей көнендә Анна Семеновнаны җирле мәдәният йорты хезмәткәрләре һәм Петропавел авыл җирлеге башлыгы Дмитрий Никитиннар котлады аңа иң изге теләкләр җиткерделәр. 

Дмитрий Никитин юбиляр әбигә аның озак еллар авыл хуҗалыгында хезмәт итүе, алты баланы лаеклы тәрбияләве, игелекле йөрәге һәм тормыш сөючәнлеге өчен рәхмәт сүзләрен ирештерде.