“Сезнең исемнәрегез безнең йөрәкләрдә“

Бу китапны булдыру турындагы фикер 10 ел элек Зирекле музеенда совет гаскәрләрен чыгаруга 15 ел тулу уңаеннан уздырылган сугышчы-әфганчылар очрашуында туган иде. Һәм шушы вакыттан бирле китап авторлары музей директоры Мидхәт Газыймов, Михаил Демидов һәм Гөлшат Габетдинова сугышчы-интернационалистлар турында мәгълүматлар: биография, бүләкләре, сугышчан хәрәкәтләр турында сөйләгәннәрне һ.б. бөртекләп җыйдылар. Материаллар туплауда тарихчылар (М. Черепанов), тарих укытучылары, мәктәп директорлары, аларның урынбасарлары, мәктәп һәм авыл китапханәчеләре, авыл халкы, әфганчыларның әти-әниләре һәм туганнары, полиция, хәрби комиссариат хезмәткәрләре бәяләп бетергесез ярдәм күрсәттеләр. Проектны тормышка ашыру өчен 2013 елның февраль башларында "Аҗаган" яшүсмерләр клубы "РИТЭК" ААҖ һәм "Лукойл" хәйрия фонды ел саен үткәрә торган социаль һәм мәдәни проектлар конкурсына кушылды һәм 2 грант отты. Бу акчалар әлеге китапны бастыруга тотылды. Китапта күп санлы фоторәсемнәр һәм иллюстрацияләр белән бергә сугышчы-әфганчылар турында "Яңа Чишмә хәбәрләре" газетасында чыккан мәкаләләр, хатирәләр, солдат хатлары, укучыларның конкурс иншалары, җирле шагыйрьләрнең шигырьләре урын алган. Анда 80 нче еллар азагында 90 нчы еллар башында совет матбугатында, 2004 елдан республика ММЧ-да басылган мәкаләләр дә бар, кызыклы тарихи мәгълүматлар китерелгән, сугыш операцияләре буенча әфган сугышының барышы чагылыш тапкан.

Кереш сүздә әйтелгәнчә, бу китап үлгәннәр өчен түгел, ә исәннәр өчен. Бу Хәтер Китабы - үз хәрби бурычларын азаккача үтәгән солдатларны ихтирам итү билгесе. Аларның батырлыкларын, күрсәткән геройлыкларын башкалар да онытмас дип ышанасы килә, чөнки бу сугышчылар Бөек Ватан сугышында җиңүчеләрнең сугышчан традицияләрен һәм батырлыкларын турыдан-туры дәвам итүчеләр һәм варислар. Бу китапны сез һәр мәктәп һәм авыл китапханәсендә таба аласыз, аны кызыксынып укуыгызга шик юк.

Ольга ИВАНОВА