2 гыйнварда Яңа Чишмәдә «Киез итек бәйрәме» дигән күңел ачу чарасы булып узган

2 гыйнварда РМЙ мәйданында яктыртылган төп чыршы һәм боздан ясалган  Яңа ел композицияләре янында «Киез итек бәйрәме» дигән Яңа ел чарасы булып узган.  Балаларга бозлы таудан шуу, Кыш бабай белән хоккей уйнау мөмкинлеге, аркан тартышу, нәниләргә – тылсымчыга шигырь сөйләү, Куян һәм Бүре белән фотосессия, башка уеннар һәм конкурслар тәкъдим ителгән.

Мәдәният хезмәткәрләре район үзәгендә яшәүчеләргә театральләштерелгән тамаша, бию һәм әйлән-бәйлән күрсәткәннәр, баянга кушылып җырлар һәм такмаклар җырлаганнар.  Моннан тыш, рәсемле киез итекләр һәм рус сувенирлары күргәзмәләре оештырылган. Сувенирларны сатып алу мөмкинлеге дә булган.  Бәйрәмнең төп җыры итеп, әлбәттә, «Валенки» җыры сайланган.

Яңа Чишмә районы иң яхшы Яңа ел бизәлеше һәм Яңа ел чараларын иң яхшы оештыру буенча республика конкурсында катнаша. 2 гыйнварда  Шахмай авылында һәм Яңа Чишмәдә үткән Яңа ел чараларына килгән республика комиссиясе, районны ( призлы урынга дәгъва кылучы буларак) югары бәяләгән.