Акбүредә әдәби кичә

24 апрельдә Акбүре авылында Казан, Түбән Кама, Яр Чаллы шәһәрләреннән килгән кунаклар катнашында бәйрәм - әдәби-музыкаль кичә булып узды.

Җирле мәдәният йорты хезмәткәрләре Галия Миншина һәм Гөлия Вәлиуллина өч бүлектән торган матур сценарий әзерләгәннәр. Беренчесе Г.Тукайның 135 еллыгына багышланган, аннары - җирле авторлар Минҗиһан Минхәерова, Хәтимә Хөснуллина һәм Җәүдәт Юнысов китапларын тәкъдир итү иде.

Кичә башланыр алдыннан АМЙга җыелган кунаклар (ә алар аз түгел) җирле музейда булдылар, анда музей директоры Вәсил Вәлиуллин авыл тарихы, күренекле якташлар турында җентекләп һәм аңлаешлы итеп сөйләде.

Аннан соң Мәдәният йортында бик кызыклы, мавыктыргыч чара булды.

Сәхнәдән Г. Тукай шигырьләре, аның сүзләренә язылган җырлар яңгырады. «Ватаным Татарстан» газетасы журналисты, Г.Тукайның ерак туганы Риман Гыйлемханов Казахстанга Г. Тукай эзләре буйлап сәяхәтләре турында бик тә кызыклы итеп сөйләде.

Район башкарма комитеты җитәкчесе урынбасары Александр Еронтьев Туган телләр һәм халыклар бердәмлеге елы безнең районда бик актив уза, күп төрле чаралар үткәрелә, дип билгеләп үтте. «Районда җирле патриотларның үз туган илләре, җирле халык турында китаплар язучы һәм аларны бастырып чыгаручыларның күп булуы куандыра. Җәүдәт Юнысовның «Ияләр нәрсә диер...» дигән китабы да үз укучыларын табачак, мин моңа ышанам. Барыгызга да яңа иҗади уңышлар телим», - диде Александр Еронтьев һәм барлык өч китап авторына истәлекле бүләкләр тапшырды.

Үз чыгышында авыл җирлеге башлыгы Җәүдәт Җәләлетдинов уздырыла торган чаралар, туган телләрне саклау кирәклеге турында сөйләде. Ул китап авторларына иҗади хезмәтләре өчен рәхмәт белдерде, бүләкләр һәм Рәхмәт хатлары тапшырды.

Акбүрелеләр юмор остасы, җырчы, композитор Алмаз Хәмзинның музыкаль-әдәби чыгышын бик җылы кабул иттеләр. Ул Юнысовлар гаиләсе турында бик җылы сүзләр әйтте, тормыштагы кызыклы вакыйгаларны сөйләде, үз җырларын һәм шигырьләрен башкарды.

Җ. Юнысов белән газета редакцияләрендә бергә эшләүләре турында Азат Мусин, Түбән Камадан Виктор Шаурин искә алды, ә Чулпан Әхмәтова Җ. Юнысовның ТР Дәүләт Советы матбугат хезмәтендә төрле яклы уртак эше турында сөйләде һәм үз шигырьләрен укыды. «Шәһри Казан» газетасы журналисты, Акбүре авылында

туып-үскән, берничә китап авторы Фәнис Мотыйгуллин һәм Зирекле музее хезмәткәре, туган якны өйрәнүче Мидхәт Газыймов авторны чираттагы китабы белән котладылар. Сыйныф җитәкчесе Гөлфирә Закирова Җәүдәтнең үрнәк һәм тәртипле укучы булуын искә алды.

Илназ Шәйхетдинов, «Чулпы», «Моңлы чишмә» вокаль ансамбльләре, Илсөяр Дәүләтшина, Рамилә Халикова, Җәлил Җәләлетдинов, Омскидан Розалия Шипова һәм башкалар үзләренең җыр-биюләрен бүләк иттеләр.

- Мин китапны шундый матур итеп тәкъдир итүне оештырган өчен барысына да бик рәхмәтле, - дип билгеләп үтте Җәүдәт Юнысов. – Барыннан да элек район башлыгы Вячеслав Козловка, аның урынбасарларына, мәдәният бүлеге һәм Акбүре АҖ хезмәткәрләренә, мәдәният йорты, музей, мәктәп хезмәткәрләренә һәм барлык якташларга рәхмәт сүзләрен җиткерәм. Шунысы куанычлы, минем китапны тәкъдир итү истәлекле дата – бөек шагыйребез Габдулла Тукайның 135 еллыгына туры килде һәм бу икеләтә күңелле. Минем китапның максаты - татар теленең барлык диалектларын, аның үзенчәлекләрен саклап калу, авылларыбызны, аларның көнкүрешен саклау һ. б., китап барлык укучылар өчен кызыклы булыр дип өметләнәм.

Соңыннан автор барлык чыгыш ясаучыларга һәм Акбүре мәктәбе укытучыларына үз китапларын бүләк итте.

Чара ахырында барысы да бөтен дөнья татарларының рәсми булмаган гимнын - Г.Тукай шигыренә язылган «Туган тел» җырын башкардылар.

Башка фотоларны безнең novoshishminsk.ru сайтында карагыз.