Балалар бакчалары тәрбиячеләренә Рәхмәт хатлары тапшырылган

Яңа Чишмәнең «Теремок» балалар бакчасында «Мәктәпкәчә яшьтәге балаларга юл йөрү кагыйдәләрен өйрәтүдә уен технологияләре» дигән темага район семинары узган.

Семинар барышында «Юл хәрәкәте иминлеге» ДБУ профилактика бүлеге начальнигы Алина Филиппова һәм мәгариф бүлеге методисты Ләйсән Әхмәтшина үзләрендә тәрбияләнүче балаларны юл хәрәкәте кагыйдәләренә һәм күнекмәләренә өйрәтү белән җентекләп шөгыльләнүче балалар бакчалары тәрбиячеләренә Рәхмәт хатлары һәм истәлекле бүләкләр тапшырганнар.

Семинардан соң «Ландыш» балалар бакчасы тәрбиячеләре Людмила Иванова һәм Венера Залаковалар әзерлек төркеме балалары һәм Алина Филиппова белән бергә «Сак булыгыз! Тайгак юл» дигән акция үткәргәннәр.

Акциянең максаты - машина йөртүчеләргә һәм җәяүлеләргә бозлавык вакытында куркынычсыз машина йөртү һәм юлда үз-үзләрен тоту кирәклеген искәртеп үтү. Акция вакытында очраган юл хәрәкәтендә катнашучыларның барысына да белешмәлекләр таратылган.