Гаҗәеп китап дөньясы: Шахмай музеенда «Халыкара балалар китабы көне» булып узган

Бу хакта редакциягә музей филиалы мөдире Гөлүсә Баһаутдинова хәбәр итте.
«Китап - безнең тормышта иң мөһим, иң кирәкле әйберләрнең берсе. Ул киңәшче дә, ярдәмче дә, уйландыручы да, дөреслеккә юл күрсәтүче дә. Китап - ул кеше уйлап чыгара алган сирәк могҗизаларның берсе, халкыбызның күңел байлыгы, рухи хәзинәсе. Китапларда халыкның ерак гасырлардан килгән тарихы, җыр-моңнары, акыллы киңәш-фикерләре сакланган һәм буыннан-буынга, чордан-чорга күчеп безнең көннәргә килеп җиткән. 
2 апрель - Халыкара балалар китабы көне. Бөтендөнья балалары яратып укый торган әкиятләрнең авторы Ганс Христиан Андерсен 1805 елның 2 апрелендә туган. 1967 елдан бәйрәм ителүче Халыкара балалар китабы көне нәкъ менә бөек әкиятченең туган көнендә билгеләнә дә инде.
3 апрельдә «Мирхәйдәр Фәйзи исемендәге Шахмай авылы тарихы музее» филиалында Шахмай урта гомуми белем бирү мәктәбенең башлангыч сыйныф укучылары белән әлеге бәйрәм турында әңгәмә узды. Укучылар балачакта әти-әниләре укыган әкиятләр турында сөйләделәр, бергәләп иң танылган балалар язучыларының китапларын укыдылар. Балалар белән бергәләп әкиятләр уку - кызыклы маҗара, чөнки ул олыларны да үзе белән әкияти дөньяга алып кереп китә».