Яңа Чишмә районының террорчылыкка каршы комиссия утырышында иҗтимагый куркынычсызлык мәсьәләләре каралды

Утырышны комиссия рәисе, район башлыгы Вячеслав Козлов үткәрде.

Алдагы утырыш беркетмәсенең үтәлеше турында ТКК секретаре Айгөл Глазунова хәбәр итте. Аның барлык пунктлары, нигездә, үтәлгән.

Зирекле авыл җирлеге территориясендә террорчылыкны һәм экстремизмны профилактикалау эшчәнлегенең торышы турында АҖ башлыгы Җәлил Гайфетдинов сөйләде. Ул билгеләп үткәнчә, бу мәсьәләләр АҖ башкарма комитетының даими контролендә тора, хуҗасыз торакны, шулай ук чит кешеләрне яки пропискасыз яшәүчеләрне ачыклау максатыннан торак секторында даими тикшерүләр үткәрелә. Мәгариф, мәдәният учреждениеләрендә һәм халык арасында даими профилактика эшләре алып барыла. Җирлектә милләтара һәм конфессияара мөнәсәбәтләр тыныч, бернинди проблемалар юк.

Республика көнен, Белем көнен һәм Татарстан Дәүләт Советына сайлауларны әзерләү һәм уздыру чорында иҗтимагый куркынычсызлыкны көчәйтү һәм террорчылык актларын кисәтү буенча өстәмә чаралар турында ЭЭМБ начальнигы урынбасары Артем Зиновьев җиткерде. Бу көннәрдә көчәйтелгән оператив төркемнәр оештырылачак, ярдәмгә Казаннан 10 полиция хезмәткәре киләчәк.

Мәгариф бүлеге начальнигы урынбасары Александр Улитин мәгариф объектларының террорчылыкка каршы көчәйтелгән сакланышы һәм чаралар, мәгариф өлкәсендә террорчылык идеологиясенә һәм неонацизм идеяләренә каршы көрәш эшчәнлегенең торышы турында сөйләде.

Утырыш азагында район башлыгы куркынычсызлык объектларын паспортлаштыруны төгәлләү зарурлыгын билгеләп үтте, мәктәпләрдә һәм балалар бакчаларында үткәрү режимын үтәү, бәйрәмнәр вакытында кизү торуны оештыру турында аерым ассызыклады. «Барлык бу мәсьәләләр даими контрольдә булырга тиеш», - дип билгеләп үтте Вячеслав Козлов.

Район халкына искәртеп үтәбез: җирлекләрдә шикле әйберләр, таныш булмаган һәм чит кешеләр тап булсагыз, гадәттән тыш хәлләр вакытында ЭЭБнең кизү тору частена 2-26-73, 01, 02 телефоннары буенча (кәрәзле телефоннардан - 101, 102, 112) кичекмәстән хәбәр итәргә кирәк. ТР буенча Россия ЭЭМнең ышаныч телефоны - 8 (843)291-20-02.