Юка боз өстенә чыкмагыз

Россия гадәттән тыш хәлләр министрлыгының ТР буенча Баш идарәсе матбугат хезмәте хәбәр иткәнчә, 24 ноябрьдә Яшел Үзәндә боз астына төшеп, ир-ат һәлак булган. Узган атнада Казанда ике кечкенә баласы белән боз астына төшеп киткән әни кешене шул тирәдән үтеп баручылар коткарган. 6 декабрьдә Чистайдагы Кама елгасында бер балыкчы су астына киткән.
Яңа Чишмәдәге янгыннардан коткару гарнизоны начальнигы, эчке хезмәтнең өлкән лейтенанты Айдар Канафин район халкын юка бозның куркыныч булуы турында кисәтә:
-Яңа Чишмә районында боз барлыкка килә торган сулыклар бар һәм, нигездә, балыкчылар, шулай ук кышны сагынып, тимераякта шуарга теләгән балалар әле ныклап катып та бетмәгән юка боз өстенә чыгалар. 

- Кешеләр өчен бозның калынлыгы нинди булырга тиеш?

- Бер кеше өчен куркынычсыз боз калынлыгы ким дигәндә 7 см булырга тиеш;

- шугалак ясау өчен — 12 см һәм аннан да күбрәк;

- җәяүлеләр өчен −15 см һәм аннан да күбрәк.

Исегездә тотыгыз:

- соры боз гадәттә селкетеп карауга ук җимерелә — тарала;

- яңа барлыкка килгән боз өстенә төшкән кар, боз катламының ныгуын акрынайта;

- тиз агымсуда, тирән һәм җил өчен ачык урыннарда, сазлы ярларда; күперләр астында; тар сулыкларда; коммуналь предприятиеләрдән су агызу урыннары янында; камыш һәм башка су үсемлекләре үскән урыннарда боз юка була.

Бозда үз-үзеңне тоту кагыйдәләре:

* Караңгыда һәм күрүчәнлек начар булганда (томан, кар, яңгыр яуганда) боз өстенә чыгарга ярамый.

* Сулык аша барыбер чыгарга туры килгәндә, тапталган яки инде чаңгы юлы салынган урыннан бару — куркынычсызрак. Ләкин алар да булмаса, боз өстеннән барыр алдыннан урынны җентекләп карарга, булачак маршрутны билгеләргә кирәк.

* Бозның ныклыгын аяк белән таптап, сикереп тикшерергә ярамый.

* Юка, ярылган бозда була калсагыз, сак кына кире борылырга һәм үткән юлдан ярга таба тайгак адымнар белән генә кайтырга кирәк.

* Бозда балык тотканда бер-береңнән 5-6 метр ераклыкта бозны тишеп, чокырлар ясарга киңәш ителми. Бәла булмасын дисәң, балыкчыда коткару жилеты яки күкрәкчәсе, шулай ук 15-20 м озынлыктагы бау (бер очы элмәкләп бәйләгән, ә икенче очында — 400-500 граммлы йөк) булырга тиеш.

* Шуны белергә кирәк: бозлы суга эләккән кеше 10-15 минуттан соң туңа һәм 20 минуттан соң аңын югалта ала. Шуңа күрә зыян күрүченең гомере коткаручыларның акыл белән һәм тиз арада ярдәм күрсәтүенә бәйле.