Кайбер Яңа Чишмә фермерларының пар басуларында чүп үләннәре гөрләп утыра

Бүгенгесе көндә барлык мәйданнар да культиваторлар, дискаторлар һ.б. агрегатлар белән беренчел эшкәртүне узган. Шунысын да билгеләп үтәргә кирәк, күпчелек хуҗалыклар соңгы елларда пар басуларына зур игътибар бирә, алар әлеге җирләрдән мул уңыш алуга өметләнә.
10 мең гектардан артык мәйданы идеаль хәлдә булган «АгроРаздолье» ҖЧҖне, шулай ук «Скоков Н.А.», «Козлова М.И.», «Вәлиев Ф. Р.», «Нурхамәтов З. М.» КФХларын уңай яктан билгеләп үтәргә мөмкин.
Шул ук вакытта  Александр Хорьков, Айгөл Кадыйрова, Олег Анисимов кебек «җир хуҗалары» һәм башка фермерлар парга калдырылган җирләрне эшкәртүне соңгы срокка калдыралар. Аларның пар басуларында чүп үләннәре гөрләп үсеп утыра, бу - туфракта туклыклы матдәләр тупланмый, дигән сүз.
Чиста пар һичшиксез чиста булырга тиеш. Бары тик шул очракта гына туфрак ял итә һәм анда уңдырышлылыкны яхшыртучы кирәкле физик-химик процесслар бара.
 Чүп үләннәре баскан, ял итмәгән парга калдырылган җирләр (басулар)  ашламалар кертеп һәм элиталы орлыклар белән чәчелсә дә, яхшы уңыш алуга өметләнеп булмый. Җитәкчеләр моны аңларга тиеш.