Ленино мәктәбе фойесында СВО зонасында һәлак булган Батырлык ордены кавалеры Алик Таһиров истәлегенә мемориаль такта урнаштырылды

Мемориаль тактаны ачу тантанасына килгән район башлыгы Вячеслав Козлов Аликның әнисенә улын лаеклы тәрбияләгәне өчен рәхмәт белдерде, Аликның СВО зонасында сугышканын һәм хәрби бурычын үтәгәндә батырларча һәлак булуын билгеләп үтте. «Без аның турындагы истәлекне мәңге сакларга тиеш», - дип ассызыклады ул һәм һәлак булган сугышчының гаиләсенә һәръяклап ярдәм итүен вәгъдә итте.

- Алик шат күңелле, намуслы укучы иде, сыйныфташларына һәрвакыт ярдәм итәргә әзер булды, - диде аның сыйныф җитәкчесе Зөлфия Хәсәнова.

Аликның сыйныфташы Сергей Вавилов та аның һәрвакыт ярдәмгә килергә әзер булуын, ышанычлы һәм тугры дус була белүен билгеләп үтте.

Чарага җыелучылар геройны бер минутлык тынлык белән искә алдылар һәм мемориаль тактага чәчәкләр куйдылар.