«Мәхәббәт һәм тугрылык өчен» медале Валиевлар гаиләсенең истәлегенә әвереләчәк

Яңа Чишмә муниципаль район Советының чираттагы утырышы 8 июльдә - Гаилә, мәхәббәт һәм тугрылык көнендә узды, ә ахырдан анда район үзәгендә яшәүче Вәлиевлар гаиләсен хөрмәтләделәр.
Район башлыгы Вячеслав Козлов һәм РФ Дәүләт Думасы депутаты Олег Морозов зур гаиләгә «Мәхәббәт һәм тугрылык өчен» медале һәм истәлекле бүләкләр тапшырдылар, ромашкалар бәйләмнәре бүләк иттеләр.
Фәргать һәм Кадрия Вәлиевлар үз гаилә учагын 35 ел элек булдырып, дүрт кыз тәрбияләп үстергәннәр, бүген инде кызларының да үз гаиләләре бар. Анда Вәлиевларның 7 оныклары үсеп килә.
Фәргать Вәлиев  15 елга якын фермер хуҗалыгын җитәкли һәм ул һәрвакыт районда иң яхшылардан санала. Авыл хуҗалыгы өлкәсендәге казанышлары өчен хөкүмәт бүләкләре белән бүләкләнгән, «Татарстан Республикасының атказанган авыл хуҗалыгы хезмәткәре» исеменә дә лаек.
Шулай ук ул хәйриячелек белән дә шөгыльләнә, җирле мәчеткә ярдәм итә, күп кенә район чараларының даими иганәчесе дә.
Вәлиевлар район халкына яхшы таныш һәм абруйлы гаилә булып торалар. Анда һәрвакыт тынычлык, мәхәббәт, өлкән буынга хөрмәт, хезмәт сөючәнлек хөкем сөрә, биредә гаилә традицияләрен саклыйлар.
Фәргать һәм Кадрия Вәлиевларга медаль тапшырганда, Вячеслав Козлов: «Сезнең гаилә - чын мәхәббәт һәм тугрылык үрнәге, сез үз балаларыгыз һәм оныкларыгыз өчен генә түгел, район халкы өчен дә үрнәк булып торасыз. Зур гаиләгезгә нык сәламәтлек һәм иминлек телим!», -диде.
Ирле-хатынлы Вәлиевлар күрсәтелгән хөрмәт һәм игътибар өчен зур рәхмәтләрен белдерделәр һәм әлеге медаль гаиләнең истәлегенә әверелер дип ышандырдылар.