Шахмай авылында СВО зонасында һәлак булган сугышчы белән хушлаштылар

Район башкарма комитеты җитәкчесе Ринат Фәсахов Фәнүснең әнисе, хатыны, туганнары һәм якыннарының тирән кайгыларын уртаклашты.

- Бу безнең барыбыз өчен дә бик авыр югалту. Хәрби операциядә катнашып, Фәнүс Фәиз улы хәрби бурычын батырларча үтәде һәм Ватан өчен үз гомерен бирде. Аның исеме туган авылында мәңгеләштереләчәк, безнең барыбыз өчен дә ул мәңгегә герой булып калачак.

ТР Министрлар Кабинетының Баш ветеринария идарәсе начальнигы урынбасары Илдар Ногманов, Яр Чаллы торба заводы башкарма директоры Николай Лагуновлар да кайгы уртаклашу сүзләрен җиткерделәр.

Мобилизациягә кадәр Фәнүс Шакиров торба заводында көйләүче булып эшләгән, ярдәмчел һәм намуслы хезмәткәр булган. Аның хатыны һәм кечкенә кызы калган.

Фәнүс Шакировны соңгы юлга хәрбиләрчә хөрмәтләп озаттылар. Якташыбыз турындагы якты истәлек безнең күңелләрдә озак сакланыр!