Шахмай авылында «Урам көне» бәйрәме

Бәйрәмгә авылдашлар, урамдашлар, туганнар, якташлар җыелган. Килгән кунакларны Шахмай АҖ башлыгы Наилә Минвафа кызы бәйрәм белән котлаган.

Бәйрәмдә Хамис һәм Гөлүсә Мөхәммәдиевлар чыгыш ясаган. Шулай ук Ләйсән Харрасова һәм "Рәйхан" төркеме кызлары да матур җырлары белән бәйрәм кунакларын сөендергәннәр.

Килгән кунаклар арасында Флер Гыйльметдинов белән Зыятдинова Роза апалар да үзләренең матур җырлары белән авылдашларны шатландырганнар.
Җыр-моңга бай авылдашлар әзерләгән очрашуда барлык борчу-мәшәкатьләрне онытып, бергә күңел ачып, яңа җырлар белән танышып, шулай ук элеккеләрен дә искә төшереп, рухи ял иткәннәр.

Самавыр да кайнап торган, коймаклар да пешергәннәр.

Киләчәктә дә сау-сәламәт булып, очрашулар-күрешүләр насыйп булсын, дигән теләктә бәйрәм төгәлләнгән.