Шахмай музеенда «Без кино турында нәрсә беләбез?» дигән чара булып узды

Халыкара кино көне - кинематографистлар, әлеге гаҗәеп сәнгать хезмәткәрләре һәм аны яратучылар бәйрәме. 1895 елның 28 декабрендә Парижда Капуцинок бульварындагы «Гранд-кафе»да бертуган Люмьерлар синематографының беренче сеансы узган. Нәкъ менә шушы дата Халыкара кино көне дип билгеләнгән.

Шул уңайдан «Мирхәйдәр Фәйзи исемендәге Шахмай авылы тарихы музее»нда 7 сыйныф укучылары белән мавыктыргыч әңгәмә узган. Балалар үз юлында зур үсеш һәм шактый үзгәрешләр кичергән (тавышсыздан тавышлыга, аклы-каралыдан төслегә әйләнгән, пленкага төшергән кинодан цифрлы форматка күчкән) кинематограф турында күп кенә кызыклы фактлар белгәннәр. Моннан тыш, укучылар «Без кино турында нәрсә беләбез?» дип исемләнгән презентация караганнар.