Токмач кисү зур осталык сорый

“Әлбәттә, бу шулай. Элек кәләш сорарга килгәндә дә, иң элек кыздан токмач кистереп караганнар бит. Ә бирегә килгән ханымнарның уңган хуҗабикәләр икәнен без беләбез. Алар моны бүгенге чарада камырны юка басып, токмачны нәзек итеп кисеп күрсәттеләр”. Чаллы Башы АМЙдан Илсөяр Дәүләтшина редакциягә үткәрелгән чара хакында хәбәр итте.
- "Ак калфак" хатын-кызлар оешмасы белән берлектә оештырылган  "Токмач-кунак сые" бәйрәмендә районның төрле авылларыннан килгән хатын-кызлар катнашты."Иң оста токмач кисүче" номинациясендә Зирекле авылыннан Лидия Лотфуллина, "Иң җитез токмач кисүче" номинациясендә Акьяр авылыннан Гөлсинә  Сибгатова, "Иң үзенчәлекле токмач кисүче” номинациясендә Шахмайдан Лилия Хамзина урыннар алдылар. Кызлар токмач басу серләре белән бүлештеләр, җырлый-җырлый эшләрен дәвам иттеләр.

Барлык катнашучылар да диплом һәм бүләкләр белән бүләкләнде. Районның Татар конгрессы җитәкчесе Айрат Хамәтвәлиев кызларны җиңүләре белән котлап матур теләкләрен житкерде.
Оста хужабикәләрнең күңел җылысын биреп кискән токмачын авылыбызның ялгыз ир-атына күчтәнәчкә илттек.