Түбән Кама театры Зирекледә кунакта

Зирекле мәдәният йортында Туфан Миңнуллинның «Гөргөри кызын бирә» («Сваты») пьесасы буенча музыкаль спектакль күрсәткәннәр. Керәшен татарлары тормышын чагылдырган этнографик комедия музыка һәм биюләр белән үрелеп барган, постановка да бик яхшы булган. Түбән Кама драма театрының талантлы актерлары бик матур уйнаганнар. 

Район мәктәпләренең 220 укучысы әлеге спектакльне Пушкин картасы буенча караганнар.

Зирекле музее хезмәткәрләре Туфан Миңнуллин исемендәге Түбән Кама татар драма театры коллективы өчен экскурсия үткәргәннәр.

«Театр артистлары авылыбызның бай тарихы белән таныштылар, — ди музей директоры Лидия Лотфуллина. — Алар экспозицияне зур кызыксыну белән карадылар. Артистлар белән аралашу бик эчтәлекле һәм кызыклы булды». 

Театр коллективы һәм музей хезмәткәрләре бер-берсенә алга таба да нәтиҗәле эш итүләрен, сәламәтлек, бәхет, тыныч тормыш теләгәннәр. Һәм тагын очрашырга вәгъдә иткәннәр.