Яңа Чишмә районында тракторларны һәм үзйөрешле техниканы тикшерүгә әзерлек башлана

2021 елга эш планы нигезендә һәм Татарстан Республикасы Дәүләт техник күзәтчелеге идарәсе боерыгы нигезендә (№01-05/141-пр), үзйөрешле машиналар һәм тракторлар катнашында хокук бозуларны профилактикалау һәм юл-транспорт һәлакәтләренең, бәхетсезлек очракларының санын киметү максатларында, 7 июньнән Яңа Чишмә районы территориясендә «Трактор-Тагылма» профилактик операциясе башлана.

Операция барышында ТР Дәүләт техник күзәтчелек идарәсенең үзәк аппараты хезмәткәрләренең күчмә рейдлары, ЮХИДИ бүлеге хезмәткәрләре, полициянең участок уполномоченныйлары һәм күрше районнарның дәүләт инженер-инспекторлары белән уртак рейдлар планлаштырылган. Операция барышында тракторларның, үзйөрешле техниканың һәм тагылмаларның техник торышы, техник карау узу турында таныклыкның булуы, дәүләт теркәү билгеләрен куюның дөреслеге, машина йөртүченең тиешле тракторчы-машинист таныклыгы булу-булмавы тикшереләчәк.

Рәис Хисмәтуллин,

Дәүләт техник күзәтчелек идарәсенең Яңа Чишмә районы буенча бүлек начальнигы.