Яңа Чишмәдә Интернет аша сатып алынган товарларны килеп алу өчен пункт ачылачак

Маркетплейсларны үстерү икътисад үсешен стимуллаштыра. Республикада аларның үсеше белән эш урыннары да артачак. Алар хакимият белән хезмәттәшлек итә, республика икътисадына инвестицияләр кертә, яңа эш урыннары булдыра, шулай ук алар ярдәмендә җирле товар җитештерүчеләрнең үз товарларын сату өчен өстәмә мөмкинлекләре барлыкка килә. Яшь һәм өлкән буын Интернеттан актив файдалана, ә бу әлеге мәйданчыклар байтак кына табыш китерә дигән сүз.

Яңа Чишмә районында яшәүчеләр республика шәһәрләреннән калышмый, алар төрле категориядәге товарларга (бижутериядән алып төзелеш материалларына кадәр) заказ бирә, әмма халыкны бердәнбер тискәре момент борчый - заказ буенча кайткан товарларны алыр өчен башка якын-тирәдәге шәһәрләргә барырга кирәк (әйтик, товар бирү пунктлары Чистайда бар), ә бу бик үк уңайлы түгел.

Район халкы фикеренчә, әгәр Яңа Чишмәдә товар бирү пунктлары булса, интернет-кибетләр аша сатып алу күләме күпкә артыр иде.

Район башлыгы Вячеслав Козлов йөкләмәсе буенча район территориясендә товар бирү пунктларын ачу өчен бина сайлау эшләре алып барыла.