Яңа Чишмәнең волейболчылары булдыра алганның барысын да эшләгәннәр

Ярышларда Аксубай, Нурлат, Яңа Чишмә һәм Чирмешән районнары командалары катнашкан.

ТР беренчелеге кысаларында “Татарстан-Яңа гасыр” республика иҗтимагый хәрәкәте призларына авыл районнары арасында волейбол буенча зона уеннары Нурлатта М. Хуҗин исемендәге спорткомплекста узган.

Яңа Чишмә командалары өчен ярышларның нинди нәтиҗә белән узуы турында безгә спорт мәктәбе директоры Ольга Роменская хәбәр итте.

 Яңа Чишмәнең ир-атлар җыелма командасы бу ярышларда 2 нче урынны яулаган һәм финалга чыккан. Бу команданы мактаулы урын алулары белән котлыйбыз.

Хатын-кызлар җыелма командасы исә дүртенче урынны алган. Командадагы волейболчыларның күбесе өчен бу мондый дәрәҗәдәге беренче ярышлар. Команда тәҗрибә туплый гына әле, алда аларның җиңүләре дә, җиңелүләре дә булачак, бу нормаль күренеш. Кызларга алдагы спорт уеннарында җиңүләр телибез!