Безнең кызлар Бөтенрәсәй ярышларына барачак

автор, 2 февраль 2018 - 05:51

744

27 гыйнварда Минзәләдә кече һәм өлкән сыйныф укучылары арасында гер спорты буенча ТР Беренчелеге булып узган.

Ярышлар 7-12 февральдә Ярослав өлкәсе Рыбинск шәһәрендә үтәчәк Бөтенрәсәй ярышларында республика данын яклаячак җыелма команда туплау өчен иң көчле спортчыларны ачыклау максатында үткәрелгән.

Яңа Чишмә районыннан ТР беренчелегендә Тубылгы Тау һәм Зирекле авылларыннан кызлар катнашкан. Киеренке көрәштән соң Хөсәенова Рәмизә, Габетдинова Камилә, Вәлиева Алсу 1 урыннар яулаганнар.

Бухарова Лиана, Хатыйпова Алия - 2, Кәримова Гөлназ 3 урында. Әлеге спортчы кызларның барысы да тәҗрибәле, титуллы, Республика беренчелекләрендә һәм турнирларда берничә тапкыр җиңү һәм призлы урыннар яулаучылар.

- Гер спорты буенча ярышларда катнашучы кызлар саны һәрдаим артып тора. Нәтиҗәләр дә яхшыра, - ди Тубылгы Тау мәктәбенең физкультура укытучысы, гер спорты буенча тренер, 1 республика категорияле хөкемдар Ринат Гатин. - Кызларның барысы да соңгы минутка (10 минутка) - "Стоп!" командасына кадәр эшләделәр. Нәтиҗәләр дә югары, рәсәйнекенә якын. Якын көннәрдә Татарстан Республикасы җыелма командасы составына кем һәм нинди авырлык категорияләрендә кертелүе мәгълүм булачак. Аларга ныклы исәнлек, җиңүгә ихтыяр көче, уңышлар, югары нәтиҗәләр телибез. Безне игътибарсыз калдырмаулары һәм төрле яклап ярдәм итәргә тырышулары өчен яшьләр эшләре бүлегенә һәм район җитәкчелегенә мин бик рәхмәтле, - диде ул.