Акъярда яңа мәчет төзеләчәк

30 августта Акъяр авылында мәчет нигезенә таш салу тантанасы булды. Чарада ТР Диния нәзарәте мөфтие киңәшчесе, көньяк районнар төбәге казые, Аксубай районы имам-мөхтәсибе Равил хәзрәт Зөфәров, район башкарма комитеты җитәкчесе Ринат Фәсахов, район Советы аппараты җитәкчесе Илдар Фәйзуллин, авылдан чыккан күренекле шәхесләр һәм авыл халкы катнашты, дип хәбәр итте редакциягә авыл җирлеге башлыгы Данияр Гайнуллин.
Бүгенге көндә 1992 елда төзелгән гамәлдәге мәчет бинасы заман таләпләренә туры килми, дип яза ул. Шул сәбәпле халык җыенында авыл халкы яңа мәчет төзергә ниятләде. Акъярлылар аны төзү өчен ярдәм күрсәтүчеләргә рәхмәт белдерәләр һәм бу изге эшкә үз өлешләрен кертергә теләүче яңа иганәчеләрне көтәләр.
Шушы тантанада барлык җыелган халык яңа мәчетне тиз арада төзеп бетерергә һәм кулдан килгәнчә булышлык күрсәтергә дигән тәкъдим белән таралаштылар.