Армиядә зур йөк машиналарын йөртү тәҗрибәсен алган

Шәйхетдинов Ринат Камил улы, (Яңа Чишмә)

1989-1991 еллар Әрмәнстан Республикасының Абовян шәһәрендә узган. 

«Бу шәһәр үзенең архитектурасы белән бик матур һәм туристлар өчен бик кызыклы урын. Мин автомобиль гаскәрләрендә өлкән сержант званиесендә хезмәт иттем һәм үз хезмәтем буенча Кавказның байтак юлларын әйләнеп чыктым, төрле шәһәрләрдә булдым. 

Хезмәт булмаса, мин беркайчан да мондый матурлыкны күрмәс идем. Һәм, әлбәттә, шәһәрнең матурлыгы өчен генә түгел, туган илемнең мине Ватанны сакларга чакыруына да рәхмәтлемен. Биредә мин зур йөк машиналары йөртүдә зур тәҗрибә тупладым, солдат дисциплинасының нәрсә икәнен белдем. 

Яңа ышанычлы дуслар таптым, алар белән аралашу өчен әле дә вакыт табабыз. Нинди авырлыкларны җиңәргә туры килгәнен һәм аларны нинди юмор һәм үзара ярдәмләшеп җиңүебезне искә төшерәбез. Яхшы хезмәтем өчен мине ике тапкыр Сөлчә-Баш авылына ялга кайту белән бүләкләделәр. Ләкин Кавказда, ничек кенә матур булмасын, безнең якларда табигать матуррак һәм ямьлерәк», — ди Ринат.

Солдаттагы шофер һөнәре Ринат Шәйхетдиновны хәзер дә озата бара. Ул «Стрела-М» оешмасында эшли. Ринатның хатыны Гөлүсә мәктәп ашханәсендә пешекче булып эшли. Алар инде күп еллар бергә яшиләр һәм өч бала тәрбияләп үстергәннәр.