БДИ тапшыру безгә ни тора?

Акция 2019 елгы чыгарылыш сыйныф укучыларының ата-аналарын бердәм дәүләт имтиханын үткәрү тәртибе белән таныштыру максатыннан уйлап чыгарылган.  
Барысы да чын-чынлап булды. Ата-аналар үзләрен имтихан тапшыручы сыйфатында тойсын өчен, БДИ тапшыруга мөмкин кадәр якын шартлар тәкъдим ителде. Башта 11 әни чират буенча металлорамка узды, ә аларның берсеннән металл әйберне алырга туры килде…
Рус теле буенча БДИ тапшыру өчен рус теле кабинеты аудиториясе сайлануы гаҗәп тә түгел. Башта мәгариф бүлеге начальнигы урынбасары Гөлфия Сираева БДИ процедурасы буенча 15 минутлык инструктаж үткәрде. Аннан соң аудиториядә бердәм дәүләт имтиханын оештыручы ролен башкарган район мәгариф бүлеге методисты Гөлчәчәк Нурхамәтова белән әниләр теркәлү бланкларын тутырды. Аларга рус теле буенча БДИның беренче өлешендәге 1-7 биремнәрне иншасыз үтәргә тәкъдим ителде. Тиздән үткәрелә торган акциягә VIP-катнашучылар – район башкарма комитеты җитәкчелеге вәкилләре дә кушылды.
Вакыт күп кирәк булмады, 30 минуттан соң әниләр тикшерү өчен имтихан кәгазьләрен тапшырдылар да. Нәтиҗә менә шундый – барлык бусагалар да узылган, икеле алучылар юк. 
 - БДИны үзең тапшыру ничегрәк? - дип, без акциядә катнашучылардан сораштырырга булдык. Фикерләр төрле булды.
- Мин бик тә катлаулы имтихан дип саныйм. Дулкынлану бик көчле. Без бу безнең өчен чын-чынлап тапшыру түгел, ә балаларга никадәр авыр булачагын аңлыйбыз. Әле дә хәтеремдә, без имтиханнарга чәчәкләр тотып, бәйрәмгә барган кебек бардык. Ә хәзер балаларга авыр. Хәтта алар белсә дә, дулкынланудан барысы да онытылырга мөмкин.  Мин БДИ - бик авыр, дип саныйм. Минем фикерем, аны гамәлдән чыгарсыннар һәм традицион тапшыруга әйләнеп кайтсыннар иде, – дип саный Яңа Чишмәдән Резеда Әсматуллина. 
- Биремнәр катлаулы булмады, балалар өчен дә, мөгаен, авыр булмастыр. Әмма шәхсән миңа, мәсәлән, бу металлорамканы узу психологик яктан авыр булды. Шунда ук кәеф төшә, - дип җавап бирде Черемухово Бистәсеннән Наталья Павлухина.
- Дулкынлануны сиздем, икеләнү, ышанычсызлык, билгеләнгән вакытка ул эшләрне башкарып чыга аламмы. Башта миндә күңел төшенкелеге булды, аннары оештыручы килеп дулкынланмаска өндәде, мин тынычландым, - дип уртаклашты район башкарма комитеты җитәкчесе урынбасары Валентина Семеняк. 
- Улым имтиханнарны өйдә тапшырачак һәм ОВЗ булган балалар гадәттә инша яза. Мин аның белән хәзер шөгыльләнәм. Имтиханнарны миңа тапшыру җиңел булды, өтер белән бер урында ялгыштым, барлык балалар да имтиханны үти алырлар, ә минекенә хәтта катлаулырак булыр дип уйлыйм, - диде Әдәмсәдән Нина Коробейникова. 
- Юк, ярыйсы, миңа куркыныч булмады. Барысы да яхшы булыр дип ышанырга кирәк, - дип саный Шахмай авылыннан Гөлфия Мәҗитова.
- Барлык процедуралар да, нигездә, имтихандагы кебек үк, үтәлде. Әйе, ниндидер дулкынлану, һичшиксез, бар. Тик, үз белемеңә ышансаң, теләсә кайсы ата-ана, теләсә кайсы укучы яза аладыр, мөгаен, - диде мәгариф бүлеге җитәкчесе Александр Еронтьев.
Әлбәттә, күп кенә әниләрнең БДИ турындагы бәяләмәләрендә дулкынлану, үз балалары өчен курку хисе чагыла: алар булдыра алырмы, юкмы, аларга нәрсәләр аша узарга туры киләчәк. Тик балалар - безнең чыгарылыш сыйныф укучылары, үзләрен җиңеп, бу сынауны үтә алырлармы, киләчәк күрсәтер.
Ольга ИВАНОВА