Шахмай музеенда медицина хезмәткәре көненә карата «Ак халатлы фәрештәләр» дип аталган кичә узган

Медицина хезмәткәрләренең хезмәте бик җаваплы һәм иң олы хөрмәткә лаек. Алар тормыштагы иң кадерле кыйммәтләр — кеше гомерен һәм сәламәтлекне фидакарьлек белән саклыйлар. 

16 июньдә «Мирхәйдәр Фәйзи исемендәге Шахмай авылы тарихы музее» филиалында «Ак халатлы фәрештәләр» дип исемләнгән кичә узган. Чарага Шахмай авылының фельдшерлык үзәгендә озак еллар эшләгән фельдшерлар һәм санитаркалар чакырылган. Очрашуда катнашучыларның һәрберсе әлеге профессияне ничек сайлаганнарын, ничә ел шул өлкәдә эшләгәннәрен, эшләү чорында туган авырлыкларны ничек узуларын, кызыклы хатирәләрен сөйләгәннәр. Кунакларга төрле конкурслар, медицина фәненнән интеллектуаль сораулар әзерләнгән, катнашучылар аларга рәхәтләнеп җаваплар биргәннәр.

Аралашу чәй өстәле артында дәвам иткән.