Советлар Союзы Герое исеменә тәкъдим ителгән сугышчы - якташларыбыз (ахыры)

Чын полковник

Яңа Чишмә авылыннан Былинкин Василий Игнатьевич - өч Кызыл Байрак, ике Кызыл Йолдыз, 1 дәрәҗә Ватан сугышы орденнары кавалеры.
«Сугышчан батырлыгы өчен», «Праганы азат иткән өчен», «Германияне җиңгән өчен» медальләре һәм Чехословакиянең Хәрби кресты белән бүләкләнгән.
1904 елның 31 декабрендә крестьян гаиләсендә туа. 1939-1940 елларда Испаниядә белофиннар белән барган сугышларда катнаша. Кадровый хәрби.
1941 елның 22 июненнән Бөек Ватан сугышы фронтларында. Сталинград сугышында катнашучы, Украинаның сул һәм уң як ярларын, Львов - Сандомирск, Берлин һәм Прагага һөҗүм итү операцияләрен азат итүдә катнаша.
Сугыш башланганда капитан Былинкин мотоукчылар батальоны, 1943 елдан 175 нче гвардия укчылар полкы һәм 58 нче гвардия укчылар дивизиясе белән командалык иткән.
1943 елның 24 сентябрендә Днепрга бару юлындагы сугышларда һәм Днепр аша чыкканда, шулай ук елганың уң як ярындагы дошман плацдармын яулаганда, Былинкин командованиесендәге полк 1250 солдатны һәм офицерны, 37 кул һәм станок пулеметларын, 16 минометны, 430 автоматны һәм винтовканы юк итә, 4 танкны җимерә. 1943 елның октябрендә Советлар Союзы Герое исеменә тәкъдим ителә (орден белән бүләкләнә).
1944 елдан 58 нче гвардия укчылар дивизиясе командиры урынбасары.
Сугышны 1945 елның 9 маенда Чехословакиядә тәмамлый.
1946 елда Мәскәүдә яшәгән. 1953 елдан отставкадагы полковник. 1966 елның 1 декабрендә вафат була.

Кыю политрук 

Спирин Михаил Кузьмич 1904 елда Яңа Чишмә авылында туа. 1941 елда Ташкент шәһәренең Ленин РВКсы тарафыннан мобилизацияләнә. Гвардиянең өлкән лейтенанты, 6 гвардия укчылар дивизиясенең 10 гвардия укчылар полкының 2 нче батальон полкы политругы. II һәм I дәрәҗә Ватан сугышы орденнары кавалеры.
1945 елның 12 гыйнварыннан алып 29 гыйнварына кадәр һөҗүм сугышлары вакытында Михаил Спирин, һәрвакыт батальон бүлекчәләрендә булып, шәхси үрнәк күрсәтеп, батальон сугышчыларын һәм офицерларын батырлыкка рухландырган.
26 гыйнварда, авиабомбежка һәм миномет утына карамастан, Михаил Спирин бер төркем кыю сугышчылар белән беренчеләрдән булып Одер елгасын кичә һәм дошманга каршы көрәшкә керешә, шул рәвешле бөтен батальонга «юл ача».
27 гыйнварда дошман пехотасының контратакалары вакытында безнекеләрнең пулемет расчеты сафтан чыгарыла, батальон флангының өзелү куркынычы барлыкка килә. Командир үзе пулемет ала һәм 90га якын дошман офицерын һәм солдатларын юк итеп, дошман пехотасын чигенергә мәҗбүр итә.
29 гыйнварда дошман пехотасы танкларының һөҗүменә каршы көрәшкәндә, өлкән лейтенант Спирин батырларча һәлак була.
1945 елның февралендә Советлар Союзы Герое исеменә тәкъдим ителә. Польшада җирләнгән.

Курку белмәс артиллерист 

Осипов Алексей Максимович 1920 елның 10 августында Өргәнчә авылында крестьян гаиләсендә туа. 1940 елның ноябрендә Яңа Чишмә РВКсы тарафыннан Кызыл Армия сафларына алына.
1941 елдан башлап, танкка каршы 1 нче аерым истребитель дивизионының батарея командиры - Дон, Көньяк-Көнбатыш, 3 нче Украина фронтында сугышкан. 1942-1943 елларда 333 нче укчылар дивизиясе составында «Уран», «Сатурн» һөҗүм итү операцияләрендә, Сталинград группировкасын деблокацияләү буенча «Кышкы яшен» немец һөҗүмен булдырмауда, 1943-1944 елларда - Донбассны азат итүдә, Яссо-Кишенев һөҗүм итү операциясендә катнашкан. Ике тапкыр яраланган. 
1943 елның октябрь-ноябрь айларында Осиповның батареясы дошманның 7 контратакасын булдырмый кала. Немецлар безнең солдатларга һәм коралларга якынлашкач, көрәшне алга таба алып бару мөмкинлеге булмаганлыктан, лейтенант Осипов окоптан чыга, башка солдатларга да үрнәк күрсәтә һәм алар барысы да фашистларга ташланалар. Дошман исә һәлак булган 23 солдатын яу кырында калдырып, артка чигенә. Осиповның батареясы һөҗүм иткән чорда 8 пулемет, 2 миномет, 1 корал тутырылган арба, 44 дошман солдаты һәм офицеры юк ителгән. 
Бу батырлыгы өчен хәрби часть командованиесе тарафыннан Советлар Союзы Герое исеменә тәкъдим ителгән.
Курку белмәс артиллерист бик күп батырлыклар кылган. 1944 елның 20-22 августында Молдавиядәге Кайнары станциясе янындагы дошманнар оборонасын өзгәндә, аның батареясы тарафыннан 13 берәмлек техника, ныгытмалар һәм берничә дистә дошман солдатлары юк ителә.
23 августта әлеге сугыш барышында каты яраланып, госпитальдә сугышчан иптәшләренең кулларында җан бирә.
Кызыл Йолдыз, Александр Невский, I дәрәҗә Ватан сугышы орденнары белән бүләкләнгән (һәлак булганнан соң).
Молдавиядә җирләнгән.

Сугышта 4 дошман танкын юк иткән

Емуранов Петр Иванович 1922 елның 15 маенда Кулмакса авылында туа (элек ул Яңа Чишмә районына кергән). Лейтенант, танкка каршы батарея командиры. Комбат Емуранов, немец танкларына һөҗүм ясаганда (алар саны 40 данәгә якын булган), наводчик вазыйфасын үз өстенә ала һәм 4 дошман танкын җимерә.
Сугышчы 1943 елның 7 июлендә батырларча һәлак була. Советлар Союзы Герое исеменә тәкъдим ителгән (һәлак булганнан соң), I дәрәҗә Ватан сугышы ордены белән бүләкләнгән.