Уңыш педагогларның профессиональлегеннән башлана

Күп еллар дәвамында Черемухово урта мәктәбе Яңа Чишмә районында белем бирү учреждениеләрен уку елына әзерләүдә алдынгылар сафында тора, уку елы нәтиҗәләре буенча да күп тапкырлар призлы урыннар яулый.

Быел педагогларның август конференциясендә мәктәп директоры Валентина Курбатова (эш стажы - 37 ел, шуларның 22 елы - урта мәктәп директоры вазыйфасында) берничә мәртәбә хөрмәтләү өчен сәхнәгә күтәрелгән. Кыска интервьюда: «Уңышка ирешү сере нидә» дигән сорауга Валентина Сергеевна: «Уңыш педагогларның хезмәттәшлеге һәм профессиональлегеннән башлана», - дип җавап биргән.

Черемухово мәктәбендә эш стажы 4 елдан алып 39 елга җиткән  тәҗрибәле 16 педагог эшли. Укытучыларның  өчесе югары квалификация категориясенә, 11е - беренче квалификация категориясенә ия.

2021-2022 уку елы мәктәп педагоглары өчен төрле юнәлешләрдә - һөнәри конкурсларда да, фәнни-гамәли конференцияләрдә дә, укучылар арасындагы конкурсларда да нәтиҗәле булган.

Татьяна Данилова  - «Мәгарифтәге казанышлары өчен» күкрәк билгесенә ия, 38 еллык педагогик стажы булган югары категорияле укытучы, быел республика Кирилл-Мефодий укуларында җиңүче булган, шулай ук яшьләрнең Каюм Насыйри исемендәге төбәкара фәнни-гамәли укуларында,  Онегин укуларында катнашучыларны да әзерләгән.

Ләйсән Малолеткова «Сәламәтлек укытучысы - 2021» Бөтенроссия конкурсының республика этабында 3 нче урынны алган.

Елена Данилова «Ел укытучысы - 2022» конкурсының муниципаль этабында җиңүче булган,  әлеге конкусның зона этабында да безнең район данын яклаган.

 2018 елда Черемухово мәктәбенә яшь укытучы, үзе дә шул мәктәпне тәмамлаган Ольга Сергеевна Горбунова (Шабалдина) эшкә килә.

Мәктәпне алтын медаль белән тәмамлаганнан соң, Оля Горбунова (Шабалдина) Казан (Идел буе) федераль университетында «педагогик белем алу» белгечлеге буенча белем ала.

Студент вакытында университет һәм республика чараларында актив катнаша, «Безнең яңа укытучы» гранты җиңүчесе була.

 Ольга Сергеевна педагогик практиканы Черемухово мәктәбендә үткән, диплом алгач, мәктәпкә укытучылары өчен хезмәттәш булып эшкә килгән.

Эш тәҗрибәсе зур булмаса да, яшь, перспективалы һәм креатив укытучы төрле конкурсларда, фәнни-гамәли конференцияләрдә һәм семинарларда катнаша, лаеклы нәтиҗәләргә ия була.

Быел ул «Ел укытучысы - 2022» һөнәри конкурсында Татарстан Республикасының иң яхшы педагоглары унлыгына кергән һәм «Иң яхшы экспериментатор» номинациясендә җиңү яулаган.

Оляның әнисе - рус теле һәм әдәбияты укытучысы Любовь Шабалдина кызының әлеге конкурста җиңүендә шикләнмәгән.

 «Алма агачыннан ерак төшми» диләр бит: Любовь Григорьевна үзе дә, югары квалификация категориясенә ия булучы педагог, төрле дәрәҗәдәге фәнни-гамәли конференцияләрдә җиңүчеләрне әзерли, мисал өчен, аның укучылары төбәкара лингвистик фәнни-гамәли конференциядә 1 нче урынны алганнар.

 «Элеккеге укучым Оляны мин 5 сыйныфтан ук беләм, мин аларга тарих һәм җәмгыять белеме фәннәрен укыттым.  Аның белән танышкач, беренче мизгелләрдән үк мин аның укытучы юлын сайлаячагын аңладым. Ул һәрвакыт үзеннән кечерәкләргә ярдәм итәргә, алар белән яңа мәгълүмат уртаклашырга, проблемаларын чишүдә булышырга яратты. Оля бик тырыш, барлык башлангычларны ахырына кадәр җиткерә белә торган кеше. Аның максатчанлыгы, сизгерлеге, игелеклелеге аңа нәтиҗәле эшләргә нык ярдәм итә», - ди аның турында адашы һәм шул ук вакытта каенанасы да булган Ольга Сергеевна Горбунова.

Ольга Сергеевна Горбунованың әлеге мәктәптә эшләү стажы - 30 ел.

Бүген ул үзенең 7 нче сыйныф укучылары белән горурлана, анда ул беренче сыйныфтан ук сыйныф җитәкчесе дә. Укучылар арасында «Балалар - фән дөньясында», «21 гасыр интеллекты», «Фәнгә адымнар - 2022» конкурсларының район һәм республика этапларында җиңүчеләр бар.

Ольга Сергеевна Горбуновага район җитәкчелегеннән тапшырылган Рәхмәт хатында: «Югары педагогик һәм һөнәри осталыгыгыз, Яңа Чишмә районының мәгариф системасына керткән өлешегез, яңа эш алымнары эзләвегез һәм балаларны яратуыгыз сезгә районның социаль-мәдәни үсешенә дә лаеклы өлеш кертергә мөмкинлек бирде», дигән юллар бар.

«Педагогларыбызның уңышлары укучыларның уңышларында чагыла. Ә безнең укучылар, үз чиратларында, фәнни-гамәли конференцияләрдә, гомумроссия тематик олимпиадаларында призлы урыннар яулыйлар, шулай ук иҗади юнәлештә дә үсеш алалар», - ди мәктәп директоры Валентина Курбатова.