Үз эшенең остасы

Җәүдәт белән сөйләшкәндә мин шунда ук аның гадәти булмаган отчествосына — Алга исеменә игътибар иттем. Минем соравыма Җәүдәт елмаеп кына, аның бабасы Нәҗметдин бабайның бик прогрессив кеше икәнен, ул чорларда оешкан колхоз җитәкчеләренең берсе булуын әйтте. Һәм 1930 елда туган улына да гадәти булмаган исемне — Алга дип кушкан, ягъни «алга», дигәнне аңлата, ә икенче улы Ирек исемле, бу исемнең дә мәгънәсе аңлаешлы.

Урта мәктәпне тәмамлаганнан соң Җәүдәт ике ел «Татарстан» колхозында (сүз уңаенда, ул вакытта яшьләр бөтен чыгарылыш сыйныфлары белән бергә туган авылларында калдылар) терлекчелектә эшли. Аннары Түбән Кама училищесыннан соң, сәнәгать һәм көнкүреш суыткычларын ремонтлау һәм хезмәт күрсәтү буенча белгечлек алып, ике ел шин заводында эшли.
1984-1986 елларда Украинада армиядә хезмәт итә. Нәкъ менә демобилизация алдыннан Чернобыль АЭСында авария була һәм Җәүдәт башка «дембельчеләр» белән бергә ай ярым шунда була. Автокранда эшли, аварияне бетерү буенча килгән йөкләрне һәм җиһазларны кабул итә һәм бушата. Бәхеткә, ул радиация зонасына эләкмәгән.

Шунысы кызык, ул Киевтан өенә (Мәскәү аша!) велосипедта кайта! Гәрчә, өенә кадәр кайту өчен бушлай билеты булса да. — Спорт белән шөгыльләндем, спорт велосипеды сатып алдым, алдан әзерләндем һәм тыныч кына өйгә кайтып киттем, — ди Җәүдәт ул елларны елмаеп искә алып. — Яшь идем, сәламәт идем, үземне сынап карарга булдым һәм барысы да уңышлы килеп чыкты.

Туган авылында аңа озак ял итәргә туры килми — колхоз рәисе Рәшит Лотфуллин аны хуҗалыкта газчы булып эшләргә күндерә. Нәкъ 1986-1987 елларда аның туган авылына Шахмайдан газүткәргеч сузганнар (ә Шахмайда һәм Чаллы Башында газ инде кергән булган). «Мин үзем өчен яңа булган әлеге эшкә керештем, үз авылыма да тизрәк газ кертергә теләдем, — ди Җәүдәт. — Авыл халкы җәй буе утын яки күмер әзерләде, ә кышын һәр көнне утын ягарга кирәк. Өстәвенә, күрше авылларда газның өстенлеген барысы да күрә иде — бернинди төтен, корым юк».
Яшь белгеч газлаштыруга бөтен энергиясен бирә, республика, ил буйлап материаллар һәм җиһазлар кайтарту буенча күп йөри. Чөнки ул вакытта дефицит булган газ торбалары разнарядкалар буенча аз-азлап кына җибәрелә иде.

— Әйе, ул вакытта кирәкле җиһазларны алу өчен кемгәдер каз түшкәсе яки бер банка бал, кемгәдер сарык та бирергә туры килде, — дип искә ала ул хәзер.
Шулай итеп, 1988 елда Чертуш авылында газлаштыру тулысынча тәмамлана, ә бу 100дән артык йорт һәм дистәләгән җитештерү-көнкүреш объектлары. Бу, һичшиксез, Җәүдәт Гыйльметдиновның да зур тырышлыгы.

Бер урында 37 елдан артык тырышып һәм намус белән эшли Җәүдәт. Бу елларда авылда газ җиһазлары белән бәйле бер генә авария дә, янгын да булмаган. 
Яңа Чишмә РЭГС начальнигы Владимир Дунаев үз хезмәткәре турында бик җылы сүзләр әйтә.

— Намуслы, ярдәмчел һәм тырыш хезмәткәр, — ди ул. — Барлык йөкләмәләрне сыйфатлы һәм вакытында үти. Чертуш халкына хезмәт күрсәтүдән тыш, ул шулай ук Чертуш авылының ГРПга да (газ-регулятор пункты) хезмәт күрсәтә һәм үз эшенең профессионалы булып тора.

Гыйльметдиновлар гаиләсен авылдашлары да хөрмәт итә. 1987 елда Җәүдәт Шахмай авылы кызына өйләнә һәм менә инде 36 ел алар Гүзәлия белән тату гына гомер итәләр. Зур йорт төзиләр, дүрт бала үстерәләр. Олы уллары гаиләсе белән Чистайда, кызлары гаиләсе белән Лениногорскида яши, ә игезәк кызлары әлегә үз гаиләләрен кормаган. Берсе Казанда пешекче булып эшли, ә икенчесе әти-әнисе белән яши.

Гыйльметдиновлар зур шәхси хуҗалык тоталар, биредә 5-6 баш МЭТ, шул исәптән 3 сыер, 5 ат, 15 баштан артык сарык, шулай ук күркә, бройлер һәм үрдәкләре бар. Үзләренең пай җирләрендә иген дә, печән дә үстерәләр. Моның өчен ике МТЗ тракторы, кирәкле авыл хуҗалыгы инвентаре сатып алганнар. 

— Авылда терлексез яшәргә ярамый, балаларга да булышабыз, гаилә бюджетына да керем була, — ди Җәүдәт. — Печән җыю һәм әзерләү вакытында балалар да ярдәм итә. 
Менә шундый тулы канлы тормыш белән эш сөючән Гыйльметдиновлар туган авылында яшиләр һәм без аларга сәламәтлек һәм гаилә иминлеге телибез.