Яңа Чишмә гимназиясе укытучысы Гөлзидә Рамазанова: «Уңышларым белән горурланам, үз эшемне яратам»

Югары категорияле укытучы Гөлзидә Рамазанова 19 ел Яңа Чишмә гимназиясендә математика, физика һәм информатика укыта.

- Укытучы эшендә төп юнәлеш - проект эшчәнлеге, - дип сөйләде ул. - Укучыларым дәресләргә мәгълүмати, иҗади һәм тикшеренү проектларын бик теләп әзерлиләр, көндезге һәм интернет-конкурсларда, дистанцион олимпиадаларда катнашалар, тикшеренү эшләре белән шөгыльләнәләр.

Укучылар ел саен район олимпиадалары призерлары булалар, «Яшьләр фәнни эзләнүдә», «Перспектива», «Фән канатында», «Интеллект», «КНИТУның Нобель өметләре» һәм башка республика һәм бөтенроссия конкурсларында яхшы нәтиҗәләргә ирешәләр. Төрле дәрәҗәдәге конкурсларда җиңүчеләрне һәм призерларны әзерләгән өчен Гөлзидә Рәфкатовна берничә тапкыр дипломнар һәм Рәхмәт хатлары белән бүләкләнгән.

Аларда үз тәрбияләнүчеләрен җәлеп итеп, педагог үзе «Безнең иң яхшы укытучы», «Цифрлы гасыр укытучысы», «Цифрлы гасыр мәктәбе», «Ел укытучысы» һәм башка һөнәри осталык конкурсларында уңышлы гына чыгыш ясый.

Быел ул «Авыл укытучысы» Бөтенроссия конкурсының 1 этабында, ә 2019 һәм 2020 елларда «Оста мөгаллим» конкурсы җиңүчесе булган. Бу - татар сыйныфлары белән туган телдә мәктәп фәннәрен өйрәнү буенча эшләүче укытучылар өчен республика грант конкурсы. Гөлзидә Рәфкат кызы анда физика, математика, информатика фәннәрен укыту мөмкинлекләрен киңәйтә. Быел ул «Земский укытучы» конкурсының республика финалына да кергән: 1 этапта катнашкан 90 катнашучының 30ы арасында.

- Үз казанышларым белән горурланам, - ди ул. - Мин эшемне һәм укучыларымны яратам.

Педагог үзенең 8 «А» сыйныфы җитәкчесе булуы турында сөйләде, ул аларның укуын гына түгел, дәресләрдән соң занятиеләргә дә кураторлык итә. Ә аның сыйныф балалары йөзү, картинг белән мавыга, БСМгә дә йөриләр.

- Аларның барысы да дәресләрдән соң эш белән мәшгуль. Айга бер тапкыр сыйныф белән бассейнга, даими рәвештә «Олимп» УСЗга йөрибез һәм шефлыкка алынган, педагогик хезмәт ветераны Әминә Габетдиновага булышабыз. Әйтик, «Көзге игелек атнасы»нда малайлар аның бакчасын казыдылар, кызлар өйдә

җыештырдылар. Волонтерлыкка, спортка җәлеп итеп, мин балаларга мәктәпнең дәресләр генә түгел, ул киләчәк олы тормышка да йөз тотуын күрсәтергә тырышам. Бу уку елыннан башлап минем сыйныф «Яшь янгынчылар дружинасы» булып тора. Безнең сыйныф ПСЧ-124 белән тыгыз хезмәттәшлек итә, без балалар белән анда экскурсияләргә йөрибез, ә янгын часте хезмәткәрләре балалар белән лекцияләр һәм әңгәмәләр үткәрә…

- Мин сыйныфтагы укучыларга үз балаларым кебек карыйм. Кызларым Исламия 9 нчы, Илүзә 5 нче сыйныфта укый, кайчагында аларны безгә караганда күбрәк яратасың, диләр әле, - дип елмая Гөлзидә Рәфкатовна. - Кызларымны да проектларда катнашырга җәлеп итәм. Алардан таләп итү, әлбәттә, күбрәк.

- Әни, укытучы буларак, бик таләпчән, - ди Исламия, - тик чын педагог шундый булырга тиеш тә.

Кече, урта һәм өлкән яшьтәге мәктәп укучылары өчен Гөлзидә Рәфкатовна «Үсеш ноктасы» проекты буенча робот техникасы түгәрәген һәм 9-10 сыйныф укучылары өчен «Физика дөньясында» дигән түгәрәкләрне аерым алып бара. Шулай ук үз сыйныфында татар халкының мәдәниятен өйрәнүне дә үстерә.

- Безнең сыйныфыбыз туган телдә белем ала һәм без аны югалтмыйбыз. «Нәүрүз», «Аулак өй» бәйрәмнәрен уздырабыз, татар теле буенча викториналарда, сыйныф һәм үз кызларым белән «Әдәби марафон» онлайн конкурсында катнашабыз. «Әдәби марафон»да дипломнарын даими алабыз.

Гөлзидә Рәфкат кызының укытучылар портфолиосы өченче ел югары балл белән бәяләнә. «Тотрыклылык – осталык билгесе» («Ел укытучысы» муниципаль этабында), 2020 елда - «Күпьеллык намуслы хезмәте һәм Яңа Чишмә районының мәгариф системасын үстерүгә керткән өлеше өчен» дигән Мактау грамоталарының исемнәре үзе үк шуның дәлиле булып тора. Ә педагогның һәм аның укучыларының уңышлы проектлары әле алда!