Яңа Чишмә районы Акъяр мәктәбенең элекке директоры Фәрхәев Фоат Сәгыйр улы вафат булды

Ул 1955 елның 5 сентябрендә Акъярда туа. Белем алганнан соң үзенең педагогик эшчәнлеген 1977 елда башлый, 1978-1987 елларда Шахмай урта мәктәбендә физик культура укытучысы булып эшли. 1987 елдан 2020 елга кадәр Акъяр мәктәбендә, башта технология укытучысы, ә соңгы 11 елда директор булып эшләде. 2020 елның 1 июненнән лаеклы ялга китте. Аның эш стажы 42 ел.

Фәрхәев Фоат Сәгыйр улы менә дигән оештыру сәләтенә ия булган оста җитәкче иде. Директор булып эшләгән елларда мәктәп нык үзгәрде – уен мәйданчыгы пәйда булды, брусчатка җәелде, кабинетларга, керү төркеменә капиталь ремонт ясалды.

Ул үзенә, хезмәттәшләренә һәм кул астындагы кешеләргә таләпчәнлеге, әйләнә-тирәдәгеләргә карата принципиаль һәм дустанә мөнәсәбәттә булуы белән аерылып торды. 10нан артык укучысы аның эзеннән китте, алар хәзер безнең районда һәм районнан читтә физкультура укытучылары булып эшлиләр.

Акыллы, игелекле, позитив, барлык укучылары, хезмәттәшләре, дуслары, авылдашлары тарафыннан хөрмәткә лаек кеше иде. Ул авылның иҗтимагый тормышында актив катнашты, берничә чакырылыш җирле Совет депутаты булып торды.

Мәгариф бүлеге, белем бирү учреждениеләре, район мәгариф хезмәткәрләренең профсоюз оешмасы җитәкчеләре, Шахмай һәм Акъяр мәктәпләре коллективлары, мәрхүмнең туганнарының һәм якыннарының тирән кайгыларын уртаклашалар. Фоат Сәгыйр улы турындагы якты истәлек безнең йөрәкләрдә мәңге сакланыр.