Яңа Чишмә районының иң өлкән тыл хезмәтчәне 97 яшен билгеләп үтә

Әдия әби Яңа Ибрай авылында туа, әти-әнисен бик иртә югалта, 5 яшеннән әби-бабай янында тәрбияләнгән. Сугыш башланганда аны дус кызлары белән бергә Горький шәһәренә эшкә җибәрәләр. Анда ул хәрби заводта, аннары госпитальдә санитарка булып эшли.
Сугыштан соң, бер ел үткәч, ул Акбүре авылыннан фронтовик Минзакир Шәйхетдиновка кияүгә чыга. Әдия әбигә, сигез бала тудыруга да карамастан, урман кисүдә, колхозда күп эшләргә туры килә. Чөнки гаиләне туендырырга кирәк була, Минзакиры сугыштан аяксыз кайта.
Хәзер Әдия әби Акбүре авылында кече улы Сәлим һәм килене Рәфисә гаиләсендә яши. Күп санлы туганнары - балалары, оныклары, оныкчыклары әбиләрен яраталар һәм аңа сәламәтлек, озын гомер телиләр. Котлауларга, изге теләкләргә авылдашлары һәм авыл җирлеге башлыгы Җәүдәт Җәләлетдинов та кушыла.
Әдия әби оныгы белән. Лариса Федорова фотосы