ЗАГСта биш алтын һәм бер сапфир туй үткәрелде

Һәр гаиләнең үз мәхәббәт тарихы һәм үз тормыш тәҗрибәсе бар. Ләкин тыйнаклык, зирәклек һәм бер-берсенә карата ихтирамлы мөнәсәбәт - шул сыйфатлар аларның барысына да хас. Шулай ук барлык гаилә башлыклары – ир-атлар үз вакытында Ватан каршында хәрби бурычларын үтәгәннәр.

Быел Чаллы Башы авылыннан Фәргать һәм Розалия Әхмәдиевлар алтын туйларын билгеләп үтәләр. Фәргать ракета-артиллерия гаскәрләрендә командир булып хезмәт итә. Гомере буе «Татарстан» колхозында шофер булып эшли. Розалия тумышы белән Чистай районыннан, бу авылга укуын тәмамлагач, юллама буенча килгән. 1975 елның 6 гыйнварында узган туй көненнән аларның гаилә тарихы башлана. Розалия пенсиягә чыкканчы «Татарстан» колхозында хисапчы булып эшли. Ирле-хатынлы Әхмәдиевлар өч бала үстерә, хәзер аларның җиде оныгы бар. Бу гади авыл хезмәтчәннәре үзләренең намуслы хезмәтләре, кешеләргә ачык булулары белән ихтирам казанганнар.

Яңа Чишмәдән Василий һәм Елизавета Заворохиннар 50 ел буе иңгә-иң яшиләр. Василий Степанович махсус урта белем алганнан соң Байкал аръягында элемтә батальонында хезмәт итә. Демобилизациядән соң туган авылына кайта, биредә Елизаветаны очрата. 1975 елның 21 гыйнварында туй үткәрәләр. Гаилә тормышы тыныч, тату, гадәти көнкүреш һәм эш мәшәкатьләре белән үрелеп бара. Ике кыз тәрбияләп үстерәләр, аларның уңышларына сөенәләр. Кызлар үсеп, әниләре кебек үк югары белем ала, үз гаиләләрен коралар. Василий Степанович төрле вазифаларда эшли,  лаеклы ялга райгаздан китә. Ә Елизавета Александровна күп еллар район кулланучылар хокукларын яклау хезмәтендә эшли. Шулкадәр еллар үткәч тә, ир белән хатын үзләренең хисләрен саклап, бер-берсе, балалары, оныкларына карата кайгыртучанлык күрсәтеп гомер кичерә.

Акбүре авылыннан алтын юбилярлар Асия белән Зөфәр Мусиннар бер-берсен балачактан ук белгәннәр, бер мәктәптә укыганнар. Армиядә Зөфәр шофер булып хезмәт иткән, кайткач өйләнешкәннәр. Бу һөнәргә гомер буе тугрылыклы калган Зөфәр Габбасовичның хезмәт стажы - 44 ел. Асия Минхәер кызы 42 ел туган колхозында хисапчы булып эшли. Ир белән хатын ул һәм кыз тәрбияләп үстерәләр, аларга белем бирәләр. Бүгенге көндә балалары гаиләләре белән Әлмәттә яши. Үрнәк, ярдәмчел гаилә авылдашлары арасында тирән ихтирам казанган.

Бәйрәмдә барлык юбиляр-ларның балалары һәм оныклары да катнашты. Барысы исеменнән дә Илдар Мусин котлады: зирәк өлкән буынга ихтирам һәм рәхмәт сүзләрен җиткерде һәм апасы Резеда белән бергә әти-әниләренә зур чәчәк бәйләме тапшырды.

Яңа Иванаево авылыннан хезмәт сөючән Хорьковлар гаиләсе дә моннан 50 ел элек барлыкка килгән. Павел Иванович Германиядә армиядә автобатта хезмәт иткән. Кайткач, «Чишмә» совхозында машина йөртүче булып эшләвен дәвам иткән һәм пенсиягә чыкканчы биредә 38 ел эшләгән. Тамара Николаевна хезмәт юлын Чистай сәгать заводында башлый, аннары «Чишмә» совхозында сыер савучы булып эшли, ул таркалганнан соң пенсиягә чыкканчы «Иванаевский» совхозында эшли. Хорьковлар ике кыз үстерәләр, алар гаиләләре белән туган авылларында яшиләр, Яңа Чишмәдә эшлиләр: Наталья – Үзәк китапханәдә әйдәп баручы китапханәче, Елена супермаркетта администратор. Хорьковларның дүрт оныгы һәм өч оныкчыгы бар.

25 гыйнварда Яңа Чишмәдә яшәүче Иван һәм Татьяна Сыровлар да алтын туйларын билгеләп үттеләр. Иван Николаевич ГПТУда электр-газ белән эретеп ябыштыручыга һәм Чистай шәһәрендә ДОСААФта машина йөртүчегә укый. Хәрби хезмәтне Камчаткада диңгез пехотасында үтә. Туган авылына сержант дәрәҗәсендә кайта. Техник ярдәм машинасында машина йөртүче һәм эретеп ябыштыручы булып эшли башлый. Бер үк вакытта Чистай совхоз-техникумында техник-механик белгечлеге буенча укый, диплом алгач, техника буенча бригадир ярдәмчесе була. 1982 елдан Иван Николаевич – ХХ партсъезд исемендәге колхозның газ хуҗалыгы өчен җаваплы белгеч, ә район төзелгәч - «Чистопольгаз» ЭПУның Яңа Чишмә участогы башлыгы. Татьяна Николаевна тумышы белән Рязань өлкәсеннән, безнең районга башлангыч сыйныфлар укытучысы булып килгән. 1973 елдан башлап Яңа Чишмә мәктәбендә (гимназиядә) тарих һәм җәмгыять белеме укыта, шул белгечлек буенча Казан педагогия институтын читтән торып тәмамлый. 2004 елдан 2018 елга кадәр гимназияне җитәкли. Сыровлар ике кыз үстерәләр, аларның өч оныгы бар, бер оныгы Даша әбисе һөнәрен сайлаган – укытучы булачак.

Акъяр авылыннан сапфир юбилярлар Мөкаддис һәм Рәмзия Гарифуллиннар февральдә никахларының 45 еллыгын билгеләп үтәләр. Икесе дә Акъяр авылында туып үскәннәр. Мәктәпне тәмамлагач, Мөкаддис Чистай ДОСААФында машина йөртүчегә укыган. Гаилә башлыгы Приморьеда хезмәт итә. Рәмзия, кооператив техникумын тәмамлап, райпода ревизор булып эшли. Ике елдан соң туй ясыйлар. Мөкаддис Мирсияф улы гомер буе колхозда механизатор, Рәмзия Максум кызы сатучы булып эшли. Өч кыз үстерәләр, алар алты онык бүләк итә. Хәзер Гарифуллиннар пен-сиядә, мәчеткә йөриләр, олы яшьтә булуларына карамастан, үз хуҗалыкларын тоталар – сарык, тавык асрыйлар. Гаиләләре – ата-аналар да, балалар да – авыл тормышында актив катнаша.

Район башлыгы Вячеслав Козлов һәм аның урынбасары, хатын-кызлар советы рәисе Надежда Попкова юбилярларга җылы котлау сүзләре белән мөрәҗәгать иттеләр. Парларга рәхмәт хатлары, чәчәк бәйләмнәре һәм бүләкләр тапшырдылар.

Хәрби батырлык бәйрәме хөрмәтенә Чечнядагы хәрби хәрәкәтләрдә катнашкан Азат Суниев яшүсмерләргә РФ гражданнары паспортларын тапшырды. Алып баручылар аның хәрби хезмәте һәм бүләкләре турында сөйләделәр. Азат Рәхимҗан улы Жуков медале белән бүләкләнгән. Хәрби хәрәкәтләр ветераннары белән бергә СВО зонасындагы сугышчыларга актив ярдәм итә. Аның кулыннан РФ паспортын 11 яшүсмер алды, аларга шулай ук «Бердәм Россия»нең җирле бүлекчәсеннән истәлекле бүләкләр тапшырылды. Бүләкләү тантанасын Россия Федерациясе гимны тәмамлады.

Чараны район мәдәният йорты триосы, Илсөяр Дәүләтшина һәм Нәкыя Кашапова дуэты, яшь йолдыз Анастасия Ерашова вокаль номерлары бизәде.

Традиция буенча чара барлык катнашучыларны истәлек өчен фотога төшүе белән тәмамланды.