Батыр лейтенант

Хәрби дәрәҗәсе: гвардия лейтенанты, 40 нчы танк бригадасының икенче танк батальоны Т-34 танкы командиры. 

Украина фронты составында немец илбасарларына каршы һөҗүм сугышларында Сокаль шәһәреннән көньяктарак Көнбатыш Буг елгасын кичкәндә, лейтенант Быстренин чын сугышчан батырлык күрсәтә. 

1944 елның 18 июлендә безнең гаскәрләр тарафыннан Көнбатыш Буг елгасы аръягына куып чыгарылган дошман аның көнбатыш ярында Добрачин һәм Боратын авылларында ныгып урнаша. Танкистларга су киртәсен үтеп чыгарга һәм сугыша-сугыша елганың көнбатыш ярында әһәмиятле плацдарм алырга кирәк була. 

Кичүне күзәтеп торган дошман, гвардиячеләрне суга ташларга теләп, Добрачин авылыннан танклардан һәм танкка каршы артиллериядән көчле ут ача.

Шул чагында иптәшләрен коткару һәм плацдармны саклап калу өчен гвардия лейтенанты Быстренинның танкы кыю рәвештә алга ыргыла. Елганы һәм сазлыкны кичеп, танк дошман танкларының һәм артиллериясенең утын үз өстенә ала һәм максималь тизлектә, тоташ атыш эчендә хәрәкәт итеп, Добрачин авылына бәреп кереп, дошман сафларында ыгы-зыгы тудыра. Авыл урамнары буйлап маневр ясап, Быстренин экипажы тигезсез сугышта немецларның «Тигр» авыр танкын юк итә, дошманның пушкасын изеп үтә, пулемет уты һәм танк чылбырлары белән кичүне саклаучы бик күп немец автоматчыларын юк итә.

Быстренин экипажының кыю хәрәкәтләре аркасында дошманның аптырашта калуыннан файдаланып, кичүне үткән бригада танклары Польша территориясендә Көнбатыш Буг елгасының көнбатыш ярында плацдармны алуга ирешәләр.

Сугышны дәвам итеп, плацдармны киңәйтү өчен, Быстренинның батыр экипажы да беренчеләрдән булып Боратын авылына ташлана, үз үрнәге белән танкистларны батырлыкка өнди, ләкин танкына дошман снаряды эләгә. Танк командиры гвардия лейтенанты Быстренин, немец илбасарлары белән көрәштә үзен Ватанының тугры улы буларак күрсәтеп, аяусыз сугышта батырларча һәлак була.
Кызыл Йолдыз, I дәрәҗә Ватан сугышы орденнары кавалеры Григорий Быстренин 1944 елның 18 июлендә һәлак була, Львов өлкәсенең Добрачин авылында җирләнә. 

1944 елның 5 августында якташыбыз Советлар Союзы Герое исеменә тәкъдим ителә.

Материалларны Лариса Федорова әзерләде