Акбүре авылы Нургаяз мәчетендә чираттагы ифтар мәҗлесе үткәрелде

Җиһанда бөек ай, айларның солтаны булган Рамазан ае хакимлек итә. Ифтар – изге айда күркәм күренешләрнең берсе. Көн дәвамында ризыктан өзелеп торган организмга бәйрәм ясаудан тыш, юмартлыкка, бердәмлеккә дә бер мисал ул.

Авылдашлары, кайткан кунаклар, ураза тоткан һәр мөселманнар өчен иде ифтар мәҗлесе. Мәчеттәге ифтар мәҗлесе уздырылу шул юмартлыкның бер дәлиле булды. Ифтар белән,  бик тә ярдәмчел, җылы куллы, изге җанлы, барыбызга да бик яхшы таныш булган авылдаш ханымнар сыйлады. Табында ниләр генә юк иде.

Мәҗлестә Акбүре авыл имамнары җыелучыларга ураза тотуның әҗер-саваплары турында сөйләделәр, вәгазьләр укылды.

Мәҗлескә килгән халык бу дәрәҗәле ифтар ашыннан бик канәгать калып, һәркем аннан үзенә тәмле ризыклардан тыш, рухи азык та алды. Әлеге мәҗлесне уздыруга матди ярдәм күрсәткән авылдашларга, оештыручыларга, мөслимәләргә, әзерләүчеләргә, катнашучыларга җан тынычлыгы, күңел байлыгы, бәрәкәтле тормыш, бетмәс-төкәнмәс сәламәтлек, гаилә иминлеге телибез. Аллаһы Тәгалә ризалыгы өчен  тоткан уразалар кабул булсын! Раббыбыз ризалыгын алырга насыйп булсын  Амин!