Район башлыгы мәчет имамнары белән очрашты

Районның имам-мөхтәсибе Раил хәзрәт Фәгыйзов быел район мәчетләрендә ниләр эшләнгәнлеге турында кыскача мәгълүмат бирде. Зирекле мәчетенә реставрация ясалган (3 млн сумлык), шул ук суммалык мәхәллә кешеләре акчасына мәдрәсә (уку-тәрбия пункты), Тубылгы Тау мәчетендә мәчет белән мәдрәсәне тоташтыручы коридор төзелгән, Яңа Чишмәдә мәчет манарасы яңартылган.

Шулай ук барлык мәчетләрдә изге Рамазан ае вакытында ифтар мәҗлесләре, Корбан бәйрәменә һәм Мәүлет аена (Мөхәммәд пәйгамбәрнең туган көне) багышланган мәҗлесләр һәм вәгазьләр уздырылган, барлык теләүчеләр өчен ислам нигезләре буенча укулар оештырылган.

Район башлыгы үз чыгышында районда социаль-икътисади хәлләр торышы, авыл хуҗалыгында, социаль өлкәләрдә ниләр эшләнүе турында сөйләде, имамнарга халыкны рухи-әхлакый тәрбияләү буенча зур эш башкарулары, мәчетләрнең матди-техник базасын ныгытулары, СВОда катнашучыларга ярдәм күрсәткәннәре өчен рәхмәт белдерде һәм сорауларга җаваплар бирде.

Аерым алганда, район үзәге мәчете территориясендә футбол мәйданчыгы төзүдә ярдәм итү үтенече бар иде. Мәсьәлә каралачак.