Коръән укучылар бәйгесе
18 мартта Яңа Чишмә мәчетендә районда беренче мәртәбә үткәрелүче Коръән укучылар бәйгесенең соңгы этабы узды. Азат МУСИН
ТР мөселманнары Диния нәзарәте тарафыннан 2012 ел Коръән елы дип игълан ителде, шуның кысаларында районның барлык мәчетләрендә гарәп телендә Коръәнне сәнгатьле итеп уку һәм шушы изге китаптан сүрәләрне яттан уку буенча конкурсның алдагы этаплары узган иде. Коръәнне әйбәт укучылар (8 татар авылыннан дүртәр кеше) мәчетләрдәге имам-хатыйблар һәм укытучылары белән берлектә конкурсның соңгы этабына - район үзәгендәге мәчеткә чакырылдылар.
Конкурс башланганчы районның имам-мөхтәсибе Илгиз хәзрәт Әшрәпов конкурсны үткәрү тәртибен аңлатты: ул ике яшь төркеме буенча үтәчәк, жюри балаларның чыгышларын 25 баллы система буенча билгеләячәк, дип белдерде, һәммәсенә уңышлар теләде.
Район башлыгы урынбасары Наилә Закирова мондый бәйгенең районда беренче мәртәбә үткәрелүен билгеләп үтте, гарәп телен, Ислам нигезләрен өйрәткән укытучыларына рәхмәт белдереп, балаларга уңышлы чыгыш ясауларын теләде. Ул шулай ук мәчетләрнең имам-хатыйбларына районда ислам диненең гасырлардан гасырларга яшәп килгән, изгелеккә, тынычлыкка өйрәтүче-өндәүче бер-хәнәфилек юнәлешенең генә булырга тиешлеген искәртте.
Өч сәгатькә сузылган чыгышлар вакытында күп балалар Коръән аятьләрен һәм сүрәләрен әйбәт белүләрен күрсәттеләр, гарәп телендә Коръәнне бик йөгерек укыдылар, бу укытучыларының да зур хезмәт нәтиҗәсе.
Бәйгедә катнашучыларның белемнәрен Зирекле, Яңа Чишмә һәм Сөлчәбаш мәчетләреннән килгән имам-хатыйблардан торган жюри бәяләде. Әйтергә кирәк, ике яшь төркемендә дә кызлар җиңде, малайлар бераз тыйнаграк чыгыш ясады. Кечкенәләр төркемендә тубылгытаулылар әйбәтрәк хәзерләнгәннәр булып чыкты: беренче ике урынны Румия Кәримова һәм Динә Хәлиуллина, өченче урынны Чаллы Башыннан Илүсә Галяутдинова (өстәге рәсемдә сулдан уңга) яулады. Зурраклар төркемендә иң югары баллны Зирекле кызлары җыйды: 1 һәм 2 урыннарны Әзилә Хөснетдинова белән Зөһрә Шакирова, өченче урынны район үзәгеннән Айгөл Галиуллина (астагы рәсемдә сулдан уңга) яулады.
Җиңүчеләр һәм конкурста катнашучылар район иганәчеләре акчасына алынган бүләкләр белән бүләкләнделәр. Эшмәкәрләр: Фәрит Курмаев, Равил Яруллин, Рамил Нуртдинов, Халит Галимов, Ислам Сафин, Нияз Галяутдинов, район үзәге учреждениеләре җитәкчеләре: Кадрия Насыйрова, Илдар Рамазанов, Ришат Билалов, Рәфис Хәбибуллин, Әлфирә Гайфетдинова, КФХ башлыгы Фәргат Вәлиев, район башкарма комитеты җитәкчесе Ринат Фәсахов һәм район башлыгы урынбасары Наилә Закирова шушы күркәм гамәлгә үз өлешләрен керттеләр. Гомәр Фәсхетдинов Бөтендөнья татар конгрессы башкарма комитетының җирле бүлеге исеменнән конкурста катнашучы 4 балага истәлекле бүләкләр тапшырды.
Мәчетләрнең имам-хатыйблары һәм балаларның укытучылары да бүләксез калмадылар (китаплар һәм догалар язылган дисклар алдылар). Конкурс тәмамлангач, мәчеттә бергәләп чәй эчтеләр һәм өйлә намазы укыдылар.
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев