Мәктәп бакчадан башлана
Әлбәттә, яңа уку елына райондагы барлык балалар бакчалары да тырышып хәзерләнгәннәр, шулай да араларында ел саен башкаларга үрнәк булырдайлары да бар, алар лаеклы рәвештә призлы урыннар алалар. Беренче урынга чыккан Архангел бакчасы узган елда күп эшләгән. Биредә йокы, уен бүлмәләренә ныклап торып, дизайн белән, заманча яңа материаллар кулланып ремонт ясалган....
Әлбәттә, яңа уку елына райондагы барлык балалар бакчалары да тырышып хәзерләнгәннәр, шулай да араларында ел саен башкаларга үрнәк булырдайлары да бар, алар лаеклы рәвештә призлы урыннар алалар.
Беренче урынга чыккан Архангел бакчасы узган елда күп эшләгән. Биредә йокы, уен бүлмәләренә ныклап торып, дизайн белән, заманча яңа материаллар кулланып ремонт ясалган. Үз куллары белән суүткәргечне алыштырганнар. Территориядә кулдан ясалган яңа әйберләр: уенчык паровоз, самолет, җилкәнле көймә, руль идарәле көймә-катер, трактор, борыстан һәм фанердан эшләнгән Буратино сыны урын алган. Бар да ачык төсле буяулар белән буялган. Футбол, баскетбол уйнарга спорт мәйданчыгы да әмәлләгәннәр. Мәйданда юл хәрәкәте кагыйдәләре буенча юл тамгалары сызылган, койманы Рәсәй һәм Татарстан флаглары төсенә буяганнар. Ниятләре - юл хәрәкәте кагыйдәләрен өйрәнү өчен тамгаларны асфальтка сызу.
Яңа Чишмәдәге "Ландыш" балалар бакчасы ел саен үзенчәлекле кызыклы гамәлләре белән гаҗәпләндерә. Биредә песочницаны үзләре ясаган тупас тукыма белән япканнар. Тукымада рәсемнәр бик матур һәм төрле: орнаменттан алып пейзажга чаклы сурәтләнгән. Үстерелгән уңыштан: яңа экспозиция пәйда булган: яшелчәләр төягән арбада әби белән бабай утырган, аста йомгак белән мәче баласы. Бу сыннар цемент белән бетоннан ясалган һәм аны әвәләү - зур хезмәт сорый. Уңышның бер өлешен иске рамалардан әмәлләгән яңа теплицада үстергәннәр. Берничә төркем бүлмәсендә СанПиН таләпләрен истә тотып, обойларын каерып, стеналарын аклаганнар.
ЮХК өйрәнү, экология почмакларын яңартканнар. Баскычта стенага ясалган хайван сыннары сыйфатында инглиз телен өйрәнү буенча кызыклы күргәзмә әсбап урын алган. Балалар мәйданчыгында резина итекләрдән ясаган җанвар сыннары чынбарлыктагыдан аерылгысыз. Балалар бакчасы филиалында эчке бизәлеш, мәйданчыктагы фанер мультфильм сыннары кебек үк - яңа. Кухня өчен яңа суыру зонты сатып алынган.
Черемуховодагы "Березка"да бар да тотрыклы - әйбәт. Йокы бүлмәсендә табигать күренеше төшерелгән фотообой ябыштырылган, ул күзләрне иркәли. Яңа линолеум җәйгәннәр, бизәлеш - тиешле дәрәҗәдә. Биредә, мәктәпләрдәге кебек зур бакча, җиләк-җимеш куаклары күп. Бәрәңгеләре дә уңган.
"Белем бирү учреждениеләрен яңа уку елына хәзерләүдә зур күләмле эш башкарылган формулировкасы белән балалары аз булган балалар бакчалары да призлар алды. Болар: 12 урынлык Чертуш балалар бакчасы - башлангыч мәктәп комплексы һәм Яңа Чишмәдәге "Солнышко" (биредә дә бер төркем) балалар бакчасы. "Солнышко"да мәйданчыкны бизәүдә яңалык күзгә ташлана: матур клумбалар байтак, агачтан сюжетлы уен корылмалары, ШЯХ почмагы ясалган, бина эчендә борынгы көнкүреш әйберләреннән музей оештырылган. Яңа кухня җиһазы сатып алганнар. Чертуштагы балалар бакчасында яңа теплица һәм тиешенчә каралган зур бакча бар, спорт залында ремонт ясалган.
Балалар бакчаларының һәммәсендә дә диярлек сәнгатьчә бизәлешкә иҗади якын килгәннәр, бернинди дә шелтә юк. Үткән ел белән чагыштырганда кулдан ясалган әйберләр, чәчәк түтәлләре, үзенчәлекле клумбалар шактый, балалар өчен уен мәйданчыкларын зәвык белән бизәүгә игътибар арткан, әмма бер кимчелек бар - бар җирдә дә чәчәк түтәлләре композицияле ясалмый. Комиссия заманча таләпләрне үтәү нисбәтеннән еллык планнарны эшләп бетерү зарурлыгын, ягъни вакыт белән бергә атларга кирәклеген билгеләп үтте. Барлык балалар бакчаларына да бер кисәтү бар - уенчыклар аз. Ватылган (сынган) уенчыклар (балалар алар белән уйныйлар бит) яңалары белән даими алыштырылырга тиеш, бу исә бар җирдә дә алай эшләнми.
Балалар бакчалары биналарының кайберләрендә башка оешмалар ачылган (почта, ФАП, авыл Советы) һәм кайбер уен мәйданчыклары халык йөри торган территориягә әверелгән, бу рөхсәт ителми. Уен мәйданчыклары аша балалар яныннан өлкәннәр дәвалану өчен ФАП-ка, эш буенча авыл Советына баралар. Кыскасы, балаларга аерым керү юлы ясарга кирәк.
Әгәр дә балалар бакчасы (мәктәп, балалар мәйданчыгы) белән янәшәдә асфальт түшәлгән юл үтә икән, монда транспортның тизлеген киметү өчен "лежачий полицейскийлар" ясалырга тиеш. Бу бар җирдә дә юк.
Бакчалар хакында әйткәндә, балалар бакчаларының барысында да алар тиешенчә каралган, барлык яшелчәләр дә бар. Барысына да диярлек "5"ле куярга мөмкин. Производство биналарының (кухня, ашханә) әзерлеген, кухня җиһазларының булуы, аларның торышын (2 балалар бакчасыннан кала) "бик яхшы" дип бәяләргә мөмкин. Косметик ремонт бар җирдә дә ясалган, әмма барысына да иң зур кисәтү (Чуаш Чабаксары, Черемухово, Тубылгы Тау, Петропавел Бистәсе балалар бакчаларына, Яңа Чишмәдәге "Ландыш" һәм "Чишмә" балалар бакчаларына дәгъва юк) - кухняда һава суыру вентиляциясе юк, булганында - эшләми. Әлеге кимчелеккә өстәп - Красный Октябрьдәге балалар бакчасында ашханәдәге түбәдән су үтә. Бер суыткыч кына саклана торган әйберләр өчен җитми, өстәмә рәвештә лар-суыткыч кирәк. Әйтергә кирәк, әлеге төр җиһазга күпчелек балалар бакчалары мохтаҗ, аларда суыткычлар аз. СанПиН таләпләре буенча ашханәдәге ризык бүлү өстәлләре тимер яки өсте тимердән капланган булырга тиеш, бусы да кайбер бакчаларда юк (мисал өчен "Теремок" б/б). Ленинодагы балалар бакчасында (анда балалар күп) - көнкүреш электр плитәсен 4 комфоркалыга, тагы да куәтлерәккә алыштырырга кирәк. Монда, Красный Октябрьдәге кебек үк, электр ит тарткыч кирәк. Акбүредә кухняда суүткәргечкә капиталь ремонт ясарга кирәк. Уңай яклар - балалар бакчаларының күпчелеге кышкылыкка байтак кына яшелчә-җиләк җимешләр туңдырганнар (үз участокларында үстергән), кәбестә тозлаганнар ("Солнышко"), варенье кайнатканнар, повидло ясаганнар ("Ландыш"та 22 өч литрлы банка повидло әзерләгәннәр). Чуаш Чабаксары, Черемухово, Шахмай, Екатерининск, Чаллы Башы авылларындагы балалар бакчалары да әлеге эштә сынатмаганнар, алар да уңай яктан аерылып торалар. Алар балалар өчен ел буена җитәрлек витаминлы ризыклар туплаганнар.
Тәрбия һәм белем бирү нигезләре балалар бакчасында башлана, мәктәптә үсеш ала. Шуңа күрә балалар бакчаларының укыту-тәрбияләү процессына җитди әзерлеге - бәхәссез. Балалар бакчаларында эшләүче педагоглар быелгы уку елында алга куелган бурычларның барысын да уңышлы хәл итәрләр, дип өметләнәбез.
Ольга ИВАНОВА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев