Очрашу
Термометр баганасы нәкъ - 30 градуска төшеп җиткән якты кышкы кичләрнең берсендә (3 февральдә) мәдәният йорты студентларны үзенә җыйды.
Дөресен әйтим, яшьләрнең барысы да еш кайталмый авылга: кемдер эшли, кемдер башка сәбәпләр белән шәһәрдә тоткарлана. Шуңа да очрашу кызык булыр микән, дигән шик тә туды күңелдә. Тик шикләнүем юкка булган икән - очрашу без көткәннән дә күңеллерәк булып чыкты. Студентлар да шактый җыелды. Җыелып беткәч, өч командага бүленеп өстәлләр артына утырыштык. Алинә үзенең җырлары белән сөендерсә, Гөлнара апа исә, нәкъ безнең дәү әниләрчә киенеп, безне самавыр чәе белән сыйлады, үз чорындагы егет-кызларның ничек танышуы, хат язышу турында сөйләде. Яшьләр дә ачылып китеп, "әби"гә хәзерге заман яшьләренең танышу үзенчәлекләрен сөйләп бирделәр. Хәзерге яшьләр күбрәк бәйләнешкә керү юлы белән таныша икән.
Бергәләп җырлау, биюләр, Миләүшәнең өздереп биюе кичәбезне тагы да ямьләндереп җибәрде. Студентлар берсеннән-берсе кызыклы уеннар да әзерләп чыкканнар. Алып баручы яшьләрнең хәзерге уеннарына сокланып, бераз аңлап җиткерә алмыйча утырса, элеккеге аулак өйдә уйналган "Гөлбану", "Капкалы", "Пар алыш" уеннарында яшьлеген искә төшергәндер, мөгаен. Студентлар бу кичтә чын мәгънәсендә ял итте, аралашты, сыйныфташлары белән күреште - иң мөһиме берәү дә ямансулап утырмады. Чәй өстәле артында сыйланганнан соң, дискотекада идәннәр селкенгәнче биедек.
Чаллы Башы авылы студентларының ялын күңелле итеп оештырган Гөлнара апа белән Илсөяр апаларга рәхмәт. Безгә әле олыгайгач та сөенеп искә төшерерлек минутлар бүләк иттеләр.
Барлык студентлар исеменнән Динара Гатина,
Чаллы Башы авылы
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев