45 елдан соң очраштылар

Очрашуга 24 кеше килде, шул исәптә 9-10 сыйныфларда сыйныф җитәкчеләре булган Хәлиуллина Рәмилә Кашап кызы да бар иде. Беренче укытучылары Төхфәтуллина Мәрьям Гатяулла кызы вафат инде (1923-11.02.2011). Шулай ук 5-8 сыйныфларда сыйныф җитәкчесе булган, тарихчы Галиев Гомәр Гали улы да фани дөньядан мәңгелеккә күчте, без аны барыбыз да ярата идек, аны гади генә итеп "завуч абый" дип атый идек. Очрашуны ТР Сәламәтлек саклау өлкәсе атказанган хезмәткәре Фәттахова Розалия, Сарман районының Рангазар авылында "Умырзая" балалар бакчасының элеккеге мөдире Карамиева Мәрьямнар бик теләп оештырдылар.

Шундый эчтәлекле, чын күңелдән һәм барлык вак-төякләренә кадәр уйланылган очрашулар бик сирәк үтә. Әлеге очрашу нәкъ менә шундый булды да. Элеккеге укучылар үзләренең укытучыларын бик җылы сүзләр белән искә алдылар, мәктәп тормышындагы күңелле вакытларны искә төшерделәр, кызыклы программа әзерләгәннәр, анда һәркайсы да катнашты. Сыйныфташлар тагын 5 елдан соң очрашырга килештеләр. Ходай насыйп итсен!

Мидхәт ГАЗЫЙМОВ