Ленино мәдәният йорты «Яңа елга иске әкият белән» дигән балалар спектаклен әзерләгән

Программада биюләр, җырлар, геройлар белән уеннар булган, балалар шигырьләр сөйләгәннәр һәм әйлән-бәйлән уйнаганнар. Төрле төстәге  гирляндалар һәм шарлар белән бизәлгән чыршы аларга могҗиза хисе бүләк иткән. Тамаша башлану белән әкият геройлары - Кощей, Убырлы карчык, Урман иясе һ.б.  балаларны тылсымлы әкият дөньясына җәлеп иткәннәр. Алар бәйрәм атмосферасына чумып, кызыклы конкурсларда катнашканнар.

Кыш бабай белән Кар кызы килгәч, сабыйлар алар белән җырлап-биеп, чыршы тирәли әйлән-бәйлән уйнаганнар. «Незабудки» балалар вокаль төркеме Яңа ел җырларын тәкъдим иткән,  шулай ук «Вояж» балалар бию коллективы да чыгыш ясаган. Тамашадан соң Кыш бабай  бәйрәмдә катнашучы балаларны күптән көтелгән бүләкләре белән сөендергән.