Мәдәният хезмәткәрләре – уникаль кешеләр

Күпләр, мәдәният хезмәткәре сукмагына бассаң, җырлыйсың да биисең, үзеңнең һәм халыкның күңелен ачасың, дип уйлый. Бары тик бу юнәлеш буенча баручылар гына моның бик зур хезмәт икәнен беләләр.

Чертуш авылы мәдәният йорты мөдире Рәмзия Мусина фикеренчә, әгәр син үзең иҗади кеше булмасаң, бу һөнәрнең асылына төшенеп, үзеңне чын-чынлап мәдәнияткә багышлау мөмкин түгел.

Рәмзия үзе мәктәп эскәмия-сеннән үк үзешчән сәнгатьтә катнаша башлый. Сыйныфташлары белән авыл клубында концертлар куйган елларын хәзер дә елмаеп искә ала. Педагог һөнәрен сайлап, туган мәктәбендә укытучы, тәрбия эшләре буенча директор урынбасары булып эшләгән вакытта да барлык иҗади кичәләрне һәм бәйрәмнәрне оештыручы була. Аның укучылары республика конкурсларында һәрвакыт призлы урыннар яулыйлар.

Мәдәният йортына эшкә Рәмзия әзерлекле белгеч булып, үзенең мәдәни эшчәнлеген дәвам итү теләге белән килә. Иң беренче эш итеп, музей почмагы оештыра. Анда хәзер 600дән артык экспонат саклана, яңалары да туплана тора. Чертуш авылы тарихы, аның күренекле кешеләре турында республика матбугатына мәкаләләр яза. Ул – «Солдат альбомы», «Аулак өй» республика конкурслары лауреаты. Күп еллар район һәм Шахмай авылы җирлеге сабантуйларын алып бара. Махсус хәрби операциядә, төрле акцияләрдә катнашучыларга гуманитар ярдәм оештыруда актив эшчәнлек алып бара.

2019 елда «Иң яхшы авыл клубы» республика конкурсында Мусина Рәмзия Рәфыйк кызы җитәкчелек иткән Чертуш авылы мәдәният йорты «Халык мәхәббәте» номинациясенә лаек була.

2021 елда Мәдәният министрлыгы грантын, 2022 елда Татарстан Президенты грантын һәм күптәнге хыялы - Мәдәният министрлыгының «Иҗат коллективларын үстерүгә» грантын отып, районда беренче мәртәбә «Халык энҗеләре» районара фольклор фестивален уздыруга ирешә.  Мәдәният йортының йөзе – сигез кешедән торган «Хәтирә» фольклор төркеме. Аларның репертуарында - татар халык җырлары һәм йолалары. Өлкәннәрдән традицияләрне өйрәнеп, инде сәхнәдә җиде укучыдан торган балалар коллективы да чыгыш ясый башлаган.

Бүгенге көндә Чертуш мәдәният йортында 5 берләшмә эшли, аларда төрле яшьтәге 40ка якын авыл кешесе катнаша.

Рәмзия әйтүенчә, бу –  мәдәният өлкәсендә зур тәҗрибәсе булган сәнгать җитәкчесе Рамилә Минабетдинова белән уртак эш нәтиҗәсе.

Авыл халкының елдан-ел кимүенә, яшьләрнең шәһәрләргә китүенә, балаларның азрак тууына борчыла мәдәният хезмәткәре, чөнки авылның мәдәни тормышына да йогынты ясый бу хәл. Шуңа да карамастан, авыл халкы, район һәм республика конкурсларында катнашып, мәдәният үсешенә зур өлеш кертә, матур киләчәк турында хыялланып яши.

Гаиләдә Рәмзия – яраткан әни һәм хатын. Ире Марат белән өч бала үстерәләр: Инсаф Казанда компрессорлар заводында җитәкче урынбасары булып эшли, улы Булат көрәшче, Россиянең атказанган спорт мастеры, кызы Чулпан җиденче сыйныфта укый.  Алар барысы да аның иҗади инициативаларын хуплап каршы алалар һәм ярдәм итеп торалар.

2024 елда бөтен гаиләләре белән «Нечкәбил» республика конкурсының финалына чыктылар һәм «Гаилә кыйммәтләрен саклаучы» номинациясенә лаек булдылар. Быел Мусиннар «Гаилә тарихында гасырлар кайтавазы» республика конкурсының зона этабында уңышлы чыгыш ясады һәм Мәдәният министрлыгының Рәхмәт хаты белән билгеләп үтелде.