Моңы ташып тора
Әти-әнисе тумышлары белән Әдәмсә авылыннан булган, бүгенге көндә Түбән Камада көн итүче Фәйрушиннар гаиләсендә туып үскән, кече яшьтән сәхнәләрдә чыгыш ясап, җыр дөньясында кайнаган, республикабызда гына түгел, чит төбәкләрдә яшәүче милләттәшләребез каршында да имтихан тотарга өлгергән Марат Фәйрушинга карата моңы ташып тора дип әйтүем бер дә арттыру булмастыр. Тыйнак, сәхнә...
Әти-әнисе тумышлары белән Әдәмсә авылыннан булган, бүгенге көндә Түбән Камада көн итүче Фәйрушиннар гаиләсендә туып үскән, кече яшьтән сәхнәләрдә чыгыш ясап, җыр дөньясында кайнаган, республикабызда гына түгел, чит төбәкләрдә яшәүче милләттәшләребез каршында да имтихан тотарга өлгергән Марат Фәйрушинга карата моңы ташып тора дип әйтүем бер дә арттыру булмастыр.
Тыйнак, сәхнә түрендә бер генә артык адым да ясамас, мөлаем, чандыр гына гәүдәле бу егеттән шул хәтле моң кайдан агылып чыга икән, дип, сишәмбе көнне Яңа Чишмә РМЙ сәхнәсендә үз төркеме белән чыгыш ясаган Марат Фәйрушинның көчле, моңлы тавышын күпләр сокланып һәм шаккатып тыңлагандыр. Радио-телевидениедән ишетү һәм карау бер нәрсә, ә менә үзен якыннан күреп тыңлагач, аның, чыннан да, кабатланмас моңга ия булуына чын-чынлап инанасың. Заманында мәшһүр җырчыбыз Илһам ага Шакиров башкарган мәңге үлмәс һәм искермәс "Кара урман"ны бернинди уен коралына да кушылмый тере тавышка сузуы үзе генә дә аның нинди талантка ия һәм татар эстрадасында киләчәге өметле булуы турында искәртә, диясем килә. Яшь кенә булуына да карамастан, Марат Фәйрушин репертуарында байтак еллар элек иҗат ителгән булып та, әле һаман халык күңелендә сакланучы җырлар бихисап. Өч сәгатькә сузылган концертның сизелми бер тында үтеп китүе дә нәкъ менә сәхнәдә сүз белән артык мавыкмый, башкарган җырларының тамашачыны ялыктырмый торган, берсеннән-берсе матур һәм сүзләре мәгънәле булуыннандыр, мөгаен. Сүз дә юк, сәхнә түренә аяк атлаганчы тамашачы-якташларым үз итәрме дигән уй Маратның күңел кылларына кагылып үтми калмагандыр, әлбәттә. Аның бераз дулкынлануы сизелсә дә, купшы чәчәк бәйләмнәре бүләк итә алмасалар да, көчле алкышларга күмгән тамашачы (алар арасында артистның әбисе дә урын алган иде) мәхәббәте Маратка көч өстәде кебек: бер дә югалып калмады. Артист өчен тамашачы мәхәббәтен яулый алудан да зуррак бүләк булуы мөмкин дә түгелдер. Ә ул көнне исә гомумән Марат Фәйрушин төркеменә бәхет елмайды дип уйлыйм. Тамашачы аларны бик җылы кабул итте, алкышларын кызганмады, димәк чыгышлар күңелләренә хуш килгәндер. Ямь өстенә ямь булган, матур кием, төгәл хәрәкәтләр белән сәхнә түрендә күбәләктәй бөтерелгән "Сәйдәш" төркеме егет һәм кызларын, моңы белән шаккатырган, гел җырлатып кына торасы килгән Екатеринбург егете Виларис Садыйков, гүзәл кыз Фәридә Сөнгатова, баһадир гәүдәле Айзат Шәйхетдинов, биюче кызлары - Ландыш, концертны алып баручы, берсеннән-берсе кызыклы әсәрләр сөйләп залдагыларның күңелен күргән Фаиз, кич буе, җырларда җырланганча, сыгыла-бөгелә гармун тарткан Дамир Зариповларны Яңа Чишмә якларында әле озак искә алып сөйләрләр. Чөнки бу яшь төркемнең югары зәвыклы концерт куюларына чын мәгънәсендә сокланырлык иде. Талантлары ташып торган әлеге егет-кызларга алда да бары уңышлар гына юлдаш булсын, моң чишмәгез саекмасын, еллар узып, якташлары - яңачишмәлеләргә сәхнә түрендә халык артисты исемен яулаган Марат Фәйрушинны да күрергә насыйп булсын, диясем килә.
Фидания
ВӘЛИУЛЛИНА
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев