Питрау бәйрәме гөрләде

Питрау-керәшеннәрнең төп бәйрәмнәренең берсе, ул изге Петр һәм Павел апостолларын искә алу көнендә билгеләп үтелә. Җәй уртасында үткәрелә торган бу бәйрәм чабылган үләннәр, кыр чәчәкләре, каен себеркеләре белән ямьле. Ленино авылы мәдәният йорты янында керәшен ихатасы куелган: утын өеме белән чиста ишегалды, гөл чүлмәкләре, умарталар, киртә абзарда «дуңгыз балалары», шулай ук печән салынган чын арбалар. Арба янында «хуҗа һәм хуҗабикә». Бер читтә дару үләннәреннән ясалган себеркеләр элеп куелган - әрем, сукыр кычыткан, тукранбаш һәм, әлбәттә, каен себеркеләре.
Ленинода Питрау өченче ел рәттән клуб белән чиркәү арасында матур, тыныч каенлыкта үткәрелә. Агачлык иркен аланны әйләндереп алган, анда җәйге мотивлар белән бизәлгән сәхнә. Янәшәдә генә “Мин”һәм “Ленино” сүзләре арасында йөрәк белән баннер, ул туган авылга мәхәббәт белдерә. Каеннар ышыгында урман җәнлекләренең фанер фигуралары. Монда  кызлар венок һәм милли киемнәрдә йөрде – бу яшь артистлар концертка әзерләнә иде. Ике командага бүленгән малайлар аркан тарту буенча көч сынашты. Ерак түгел - утын кисү өчен кузла, капчык белән сугышу өчен бүрәнә, армрестлинг өстәле, Питрауда традицион учак өчен коры ботаклардан кибән һ.б. Сатучылар үз товарларын, нигездә, балалар уенчыкларын таратып куйдылар, ә килгән эшмәкәрләр балалар батутын урнаштырдылар, шашлык пешерделәр.
Ленинолылар акрынлап аланга җыелып, сәхнә каршында эскәмияләргә утырдылар. Учактан төтен исе килә - бу авылда яшәүче Денис Веретенников зур казанда Питрау кунаклары өчен шулпа әзерли. Янәшәдә зур самавыр, бюджет оешмалары хезмәткәрләре  табынга кабымлыклар, салатлар, пироглар, теләгән һәркем өчен чәй тәм-томнары куйдылар. Барысы да уңайлы булды, өйдәгечә, чөнки кунакларның күбесе авылдашлары -  ленинолылар иде бит. Район үзәгеннән авыл кешеләре, күрше авылларда яшәүчеләр, шулай ук безнең, Түбән Кама һәм Әлмәт районнарының мәдәният йорты артистлары да килгән иде. Шушы бәйрәмне күрмәү бик кызганыч булыр иде, халык бик канәгать калды. Мәсәлән, 25 яшьлек биш егет биредә беренче укытучылары Любовь Демидованы очратты. Алар аны уратып алды һәм чәчәк бәйләме бүләк иттеләр. Элеккеге укучыларның рәхмәтле йөзләрен һәм педагогның шатлыклы йөзен күрергә кирәк иде! Янәшәдә күптәнге иптәшләр Иван Пахардыймов һәм Василий Леонтьев яшь чакта авылда спорт белән шөгыльләнүләрен искә алдылар. Җирле гыйбадәтханә башлыгы Сергий атакай якшәмбе мәктәбендә тәрбияләнүчеләргә бу бәйрәмнең килеп чыгышы һәм изге апостоллар Петр һәм Павел турында сөйләде. Питрауны ачып, ул башкалар өчен тарихны кабатлады, барысына да тынычлык, игелек һәм иминлек теләде.  Концертны милли костюмнарда кызлар әйлән-бәйлән уйнап башлап җибәрделәр. Сценарий үз авылларына карата зур мәхәббәт белән язылган иде, анда Ленино тарихы, Питрауга халык традицияләре, бабайның балык каптырганда оныгына сөйли торган авылның барлыкка килүе турындагы матур риваять чагыла иде.
Авыл халкын һәм кунакларны авыл җирлеге башлыгы Виктор Веретенников сәламләде. Ул бәйрәмне оештыручылар (авыл җирлеге башкарма комитеты, мәдәният йорты, авыл активистлары) кешеләрне рәхәтләнеп ял иттерергә тырыштылар, дип әйтте һәм барысына да вакытны бик яхшы үткәрүләрен теләде. Мактаулы кунак, район башлыгы урынбасары Надежда Попкова ленинолыларны бәйрәм белән котлады, Ленино халкының моңа керткән өлешен билгеләп, авыл һәм район тормышында барган уңай үзгәрешләрне санап үтте.  
- Еллар, йөз еллар уза, һәм без сезнең белән кече ватаныбыз тарихын ясыйбыз. Әлбәттә, авылыбызның төп байлыгы-кешеләр, якташларыбыз, - диделәр чараны алып баручылар һәм быелгы авыл юбилярларын:  Татьяна Веретенникованы, Раиса Кузьмичеваны, Анастасия Арсентьеваны сәхнәгә чакырдылар һәм аларга бүләкләр тапшырылды. Шулай ук быелгы Питрауны уздыруда ярдәм иткән өчен, авылда яшәүче Сергей Карасев һәм Ленино мәдәният йорты хезмәткәрләре дә бүләкләр белән билгеләп үтелде.
Питрау көне балык тоту белән бәйле кешеләр өчен дә бәйрәм булып санала. Балыкчылар Изге Петрга яхшы балык тоту турында бөтен җирдә дога кылдылар, чөнки ул гомер башында гади балыкчы булган. Балык тотарга яратучылар Ленинода байтак икән, шуңа да «Балыкчылар» номинациясендә катнашучылар күп булды: 14 кешегә бүләкләр тапшырылды. «Без бергә 2019» республика фестиваленең Гран-при иясе «Задоринка» халык уен кораллары ансамбле (җитәкчесе Алексей Демидов) дә кыйммәтле бүләк белән билгеләп үтелде. Быел ансамбль шулай ук «Многозвучный Татарстан», «Выля, хуткупас!» республика фестивальләре лауреаты булды, «Уйнагыз, гармуннар!»  район конкурсында җиңү яулады. Балалайкада, кашыкларда уйнаучылар һәм гармунчы балалар Питрау бәйрәмендә бик оста чыгыш ясадылар. «Сурэкэ» халык ансамблен, Ленинодан «Рябинушка» вокаль төркемен, «Троица» ансамбленең (Новотроицк авылы) чибәр кызларын һәм «Ак калфак» татар хатын-кызлары җәмгыятенең район бүлекчәсенең (җитәкчесе Илсөяр Дәүләтшина) «Чишмә моңнары» коллективын халык көчле алкышларга күмде. «Район сандугачлары» РМЙ дан Илназ Шәйхетдинов, Тубылгытау АМЙ дан Елена Степанова, Благодатное АМЙ солисткасы Зөбәрҗәт Дубровина һәм Лениноның яшь башкаручылары оста чыгыш ясадылар.
Халык бәйрәме төрле уеннар белән дәвам итте. Утын кисү, гер күтәрүләр, капчык белән сугышу, аркан тарту, ә балалар күзләрен бәйләп бүләкләр кистеләр. Шулай ук аякларны бәйләп капчык киеп йөгерү һ.б.да булды. Тачкаларда гаилә узышлары, «кадак кагу», «боҗра аша үтеп кер», «иң яхшы мунча себеркесе», «иң матур венок», «иң озын толым – кызлар матурлыгы»конкурслары булды. Болар барысы да күңелле музыка, төрле мәзәкләр белән үрелеп барды. Бәйрәм төнге сәгать 11 гә кадәр дәвам итте.
- Әйдәгез, без ничек бар, шундый булып калыйк: игелекле, ярдәмчел, нык холыклы, хезмәт сөючән, үзеңә һәм якыннарыңа хөрмәт белән карау.  Безнең җырлар, мәзәкләр, ата-бабаларыбыз, балаларыбызның һәм оныкларыбызның туган көннәре яшәсен, димәк, без туган һәм хезмәт иткән авылыбызның туган көннәре дә яшәсен. Ә бу җәй шатлыклы һәм уңышлы булсын, чөнки безнең бәйрәм ел буена игелекле энергия белән баета, - диде йомгак ясап чараны алып баручылар.
 Ольга ИВАНОВА
Башка фотоларны безнең novoshishminsk.ru сайтында карагыз.