Районның эшче яшьләре – «Безнең заман – Наше время» фестивале призеры

Фестиваль үзе 2013 елдан бирле ТР Президенты Рөстәм Миңнеханов ярдәмендә һәм ЮНЕСКО эшләре буенча Россия Федерациясе комиссиясе канаты астында үткәрелә. Ул эшләүче яшьләрнең иҗади үсеше өчен мәйданчык булып тора, һәм быел Эшче һөнәрләр елына багышланган.
Фестивальнең беренче көнендә Зәйдә, 12 октябрьдә, «Хореография» һәм «Музыка»номинацияләрендә чыгышлар булды. Конкурсантларның номерларын Татарстаннан гына түгел, Мәскәүдән дә компетентлы жюри бәяләде. Икенче көн дә чыгышларга бай булды. «Минута славы» номинациясендә чыгышлар, жюри әгъзалары тарафыннан номерларны тикшерү, номерны булдыруда креатив ысуллар буенча мастер-класс булды. Жюри вәкилләре тарафыннан катнашучылар өчен эстрада номеры режиссурасы һәм заманча бию техникасы буенча кызыклы мастер-класслар үткәрделәр. Моннан тыш, белгечләр конкурсантларның номерларын җентекләп карадылар – аларга хаталарны күрсәттеләр һәм уңай якларны билгеләп үттеләр.
Кич белән гала-концертта фестиваль җиңүчеләрен бүләкләделәр. Тубылгытау авыл җирлегенең "Импульс" коллективы жюри хөкеменә "Татар кызлары" хореографик постановкасын тәкъдим итте һәм коллектив копилкасын диплом һәм "Халык традицияләрен саклаган өчен" махсус приз белән тулыландырды.
«Хореография» номинациясендә районнан шулай ук мәгариф хезмәткәрләре профсоюзы коллективы да катнашты (рәсемдә). Биредә Зәй, Чистай, Түбән Кама һәм Аксубай районнары командалары көндәшләре булды. «Күрше» бию номеры белән коллектив 3 нче урынны алды һәм ноябрь аенда Казанда узачак фестиваль финалына чакырылды.