Тәүге бәетләр китабы үз укучыларын тапты
Татар теленең аңлатмалы сүзлегендә чоңгыл сүзе елгадагы яки күлдәге бик тирән чокыр, бик тирән урын дип язылган. Елгада гына түгел, кеше тормышында да чыга алмаслык чокырлар еш очрый. Шуларның берсе - якын кешеңне югалту ачысы. Бу чоңгылдан чыгу, хәсрәтеңне басу өчен якын кешеләреңнең ярдәме, дусларыңның киң җилкәсе, сине аңлаучыларның җылы...
Татар теленең аңлатмалы сүзлегендә чоңгыл сүзе елгадагы яки күлдәге бик тирән чокыр, бик тирән урын дип язылган. Елгада гына түгел, кеше тормышында да чыга алмаслык чокырлар еш очрый. Шуларның берсе - якын кешеңне югалту ачысы. Бу чоңгылдан чыгу, хәсрәтеңне басу өчен якын кешеләреңнең ярдәме, дусларыңның киң җилкәсе, сине аңлаучыларның җылы сүзе кирәк. Безнең районда авыр хәсрәт кичергән кешеләрнең йөрәген аңлаучы, төрлечә ярдәм итәргә торучы берәү бар, ул - Газыймов Мидхәт Гариф улы. Шулай булмаса, ул югалту ачысын кичергән кешеләрнең хәлләрен аңлап, күп кешеләр әйткәнчә, "йөрәге аша уздырып" шулкадәр бәет яза алмас, район һәм күрше районнардан да җыелган бәетләрне туплап дүрт җыентык чыгара алмас иде.
Мидхәт абый өч җыентыгын "Хәтер тамчылары" дигән исем астында чыгарган булса, дүртенчесен "Тормыш чоңгыллары" дип атаган. Бу китапка аның үзе язган 74 бәете кертелгән. 21 нче декабрь көнне Зирекле музеенда бу китапны тәкъдир итү кичәсе булды. Музейга район мәктәпләрендә эшләп килүче музей җитәкчеләре, район мәдәният бүлеге җитәкчесе, Чистай район газетасы редакциясеннән ике вәкил, бәетләр китабына якыннарының бәетләре кертелгән Зирекле авылы кешеләре җыелган иде. Кичә, һәрвакыттагыча, әйбәт итеп әзерләнгән өстәлләр артында башланып китте. Иң элек бәетләр язылган әрвахлар рухына дога кылынды, Коръәннән сүрәләр укылды. Сыйланганнан соң Мидхәт абый китапның чыгу тәртибен, кемнәрнең ярдәм итүен әйтеп китте. Аннан сүз килгән кунакларга бирелде. Кунаклар Мидхәт абыйга теләкләрен җиткерделәр, китап чыгаруның четерекле булуын искәрттеләр, рәхмәт әйттеләр. Әйтмәслек тә түгел шул. Безнең Мидхәт абый район өчен, китап укучылар, үзешчән авторлар өчен искиткеч эш башкара. Безнең район турында Мидхәт абый аркылы беләләр диюем бер дә арттыру түгел. Кайсы гына районга барып музейларга керсәң дә, сүз Мидхәт абый турында сөйләшүдән башлана. Республикакүләм фәнни-гамәли конференцияләрдә катнашучы татар теле һәм әдәбият укытучыларының беренче ярдәмчесе дә Мидхәт абый. Теләсә кайсы темага документаль формада ярдәм итә ала ул, чөнки музейда нинди генә материаллар, китаплар, экспонатлар юк. Музейга килгән теләсә нинди кеше бу материалларны актарып, укып, капшап карый ала. Кайда мөмкин бу эш. Бары Мидхәт абый музеенда гына. Эшләп тә күрсәтә инде безнең Газыймов!!! Шәхсән миндә аның белән аралашып кайткан саен эшкә дәрт уяна, эшләсәң, аның кебек эшләргә, дигән теләк туа. Иншалла, эшләргә тырышабыз, аннан үрнәк алабыз. Районыбызда Мидхәт абыйдай кешеләр булганда иҗатка дәрт сүнмәс, милли үзаң югары дәрәҗәдә булыр. Сау-сәламәт, озын гомерле булсын ул. Кешеләргә эшләгән изгелеге үзенә меңе белән әйләнеп кайтсын.
Кадрия
ГЫЙЛЬМАНОВА,
Чаллы Башы урта мәктәбе укытучысы
Следите за самым важным и интересным в Telegram-каналеТатмедиа
Подписывайтесь на наш Telegram-канал "Шешминская новь"
Нет комментариев