Зиреклеләр тантаналы рәвештә үз якташларын армиягә озатканнар

21 ноябрьдә Мидхәт Газыймов исемендәге халык иҗаты һәм көнкүреше музеенда Илдар Зариповны армия сафларына озатканнар. 

Чарада Илдарның дуслары, лицей укучылары һәм Әфган сугышы ветераны Наил Лотфуллин катнашкан. Ул егетләргә армиядә хезмәт итү — мактаулы эш икәнлеген искәртте. Әлбәттә, армия — армия инде, һәм кайда гына хезмәт итсәң дә, ул җиңел булмаячак. Әмма чын ир-атлар Кораллы Көчләр сафларына үзләрен, гаиләләрен, үз илен кулларына корал тотып якларга өйрәнер өчен баралар һәм алар намус белән хезмәт итәргә тиеш.

Музей хезмәткәрләре һәм чарада катнашучылар Илдарның уңышлы хезмәт итүен һәм тизрәк якыннарының чын яклаучысы булып өйгә кайтуын теләгәннәр. Чара чәй өстәле артында дәвам иткән, элеккеге традиция буенча булачак солдатка чиккән кулъяулык бүләк иткәннәр.