Акъярлыларның хезмәт активлыгы югары

Районда гражданнар җыеннары башланды, анда 2020 елда эшләнелгән эш турында хисаплар һәм 2021 елга бурычлар белән авыл җирлекләре башлыклары чыгыш ясады. Советның беренче киңәйтелгән утырышы Акъярда узды, анда җирле АҖ башлыгы Данияр Гайнуллин отчет белән чыгыш ясады.

Җирлек башлыгы АҖ Советы депутатларының эше турында җентекләп сөйләде, барлык бюджет учреждениеләре эшенә, салымнар җыю, авыл җирлеге башкарма комитетының керемнәре һәм чыгымнары буенча анализ ясады.

Безнең белешмә

Акъяр АҖдә 118 йорт, шуларда 384 кеше теркәлгән, даими яшәүчеләр – 313. Эшкә яраклы халык - 173 кеше, пенсионерлар - 90, укучылар - 28, мәктәпкәчә яшьтәге балалар - 30.

2020 елда 4 бала туган, 7 кеше үлгән. Халыкта 95 җиңел автомобиль, 9 трактор, 325 баш МЭТ, шул исәптән 146 сыер, 274 баш сарык һәм кәҗә бар.

Үзара салым акчаларын сарыф итүгә анализ ясалды. Республика субсидияләрен исәпкә алып, барлыгы 542,5 мең сум акча җыелган. Алар, нигездә, вак таш җәюгә, юлларны чистарту һәм карап тотуга, шулай ук суүткәргеч челтәрләрен ремонтлауга һәм хезмәт күрсәтүгә тотылган.

Акъяр авыл җирлеге - шәхси ярдәмче хуҗалыкларда терлек саны һәм сөт әзерләү буенча районда иң яхшыларның берсе. Акъярлылар 2020 елда 475 тонна (11,7 млн.сумлык) сөт сатканнар. Иң яхшы сөт тапшыручылар арасында Айрат Кәлимуллин, Илдар Галимов, Фәнис Минабетдинов, Рөстәм Сәлахов бар, алар һәркайсы 500-600 мең сумлык сөт саткан.

Үз чыгышы ахырында Данияр Гайнуллин 2021 елга бурычлар билгеләде. Шуларның иң мөһиме - халыкның хезмәт активлыгын арттыру, үзара салым акчаларыннан нәтиҗәле файдалану программаларында актив катнашу.

Аның докладын ФАП мөдире Фәния Шәмсетдинова һәм «Агро-Основа» ҖЧҖ директоры урынбасары Айнур Габидуллин тулыландырды.

Район башкарма комитеты җитәкчесе урынбасары Ренат Габетдинов барлык чыгышларга йомгак ясады. Ул җыелучыларны район буенча 2020 ел нәтиҗәләре белән кыскача гына таныштырды һәм сорауларга җаваплар бирде. Алар җирле елганы чистартуга һәм фермер Нәкыйп Дәүләтшин фермасына кадәр юлны төзекләндерүгә кагылышлы иде. Сораулар контрольгә алынды.

Утырыш ахырында бүләкләү тантанасы булды. ФАП мөдире Фәния Шәмсетдинова район башлыгының Рәхмәт хаты һәм истәлекле бүләк белән бүләкләнде. Юбилярлар - Әнисә Фәрхәева, Гөлфәния Гайфетдинова, Гүзәлия Садретдинова, Тәгъзимә Гыйрфановаларга Рәхмәт хатлары һәм бүләкләр тапшырылды, ә сөт җыючы Алмаз Шәйхетдиновтан бүләк иң яхшы сөт тапшыручыларның берсе Рәсимә Минәбетдиновага тапшырылды.

Ренат Габетдинов Фәния Шәмсетдинованы бүләкли. Фото: Азат Мусин. «Яңа Чишмә хәбәрләре».